بايقاۋ – وزىق تاجىريبە، ۇزدىك ادىستەمەلەرمەن ءبولىسۋ الاڭى

بايقاۋ «سالاۋاتتى تاماقتانۋ مەكتەبى» باعدارلاماسىنىڭ 10 جىلدىعىنا ارنالادى.

استانادا «سالاۋاتتى تاماقتانۋ مەكتەبى» باعدارلاماسىن جۇزەگە اسىرۋعا قاتىساتىن باستاۋىش سىنىپ پەداگوگتەرى اراسىندا جىل سايىنعى رەسپۋبليكالىق ادىستەمەلەر بايقاۋىنىڭ قورىتىندىسى شىعارىلدى، دەپ حابارلايدى Almaty-akshamy.kz

بايقاۋ استانا قالاسى اكىمدىگىنىڭ «ادىستەمەلىك ورتالىعى»، الماتى قالاسى ءبىلىم باسقارماسىنىڭ «قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعىنىڭ» قولداۋىمەن ۇيىمداستىرىلدى.

جىل سايىن وتكىزىلەتىن بايقاۋ باستاۋىش سىنىپ وقۋشىلارىنىڭ بويىندا دۇرىس تاماقتانۋ نەگىزدەرىن قالىپتاستىرۋ بويىنشا مۇعالىمدەردىڭ ۇزدىك تاجىريبەلەرىن تاراتۋعا، باسقا قالالارداعى ارىپتەستەرىنىڭ جۇمىس تاجىريبەسىمەن تانىسۋعا مۇمكىندىك بەرەدى. بايقاۋ 2013 جىلدان باستاپ استانا جانە الماتى قالالارىنىڭ مەكتەپتەرىندە ىسكە اسىرىلىپ كەلە جاتقان «سالاۋاتتى تاماقتانۋ مەكتەبى» باعدارلاماسىنىڭ اجىراماس بولىگى بولىپ تابىلادى.

وسىناۋ ءداستۇرلى بايقاۋ بيىلعى جىلى ەرەكشە ماڭىزعا يە بولۋدا. اتاپ ايتساق، بايقاۋ «سالاۋاتتى تاماقتانۋ مەكتەبى» باعدارلاماسىنىڭ 10 جىلدىعىنا ارنالادى. ءبىلىم بەرۋدەگى زاماناۋي ۇردىستەرگە، ونىڭ ىشىندە وقىتۋ پراكتيكاسىنا يننوۆاسيالىق پەداگوگيكالىق-ادىستەمەلەردى ەنگىزۋگە وڭتايلى ىقپال جاساۋدى كوزدەيتىن بايقاۋعا مۇعالىمدەردىڭ 50-دەن استام جارقىن جانە جوعارى كاسىبي جۇمىستارى ءتۇستى. بايقاۋعا قاتىسۋشىلار باستاۋىش سىنىپ وقۋشىلارىن سالاۋاتتى ءومىر سالتىنىڭ نەگىزدەرىمەن، دۇرىس تاماقتانۋمەن، سونداي-اق ءوز ەلىنىڭ اسپازدىق داستۇرلەرى مەن ادەت-عۇرىپتارىمەن تانىستىرۋدىڭ قىزىقتى جانە ءتيىمدى تاسىلدەرىن قاراستىردى.

قالالىق كەزەڭدە (الماتى، استانا قالالارىنىڭ) جۇلدەلى ورىندى يەلەنگەن جەنىمپاز ۇستازدار بايقاۋدىڭ فينالىنا قاتىسىپ، ب ا ق سىنادى. ءادىلقازىلار القاسىنىڭ قورىتىندىسى بويىنشا:

باس جۇلدە – كاميلا ءابدىرازاقوۆا، №119 مەكتەپ، الماتى ق.،

 1-ورىن – ساحيدا احمەتوۆا، №105 مەكتەپ، الماتى ق.،

2-ورىن – اسەمگۋل اۋباكيروۆا، №4 مەكتەپ، استانا ق.

3-ورىن – سايدا يميروۆا، الماتى ق. № 78 مەكتەپ، قالدىگۇل اتىمتايەۆا، استانا ق. №51 مەكتەپ، روزا ارزەكۋلوۆا، استانا ق. №50 مەكتەپ مۇعالىمدەرى يەلەندى.

مۇعالىمدەردىڭ كاسىبي شەبەرلىگىن شىڭداۋعا، ءبىلىم بەرۋ ساپاسىن ارتتىرۋعا جەتەلەيتىن بايقاۋدىڭ وزىق تاجىريبە، ۇزدىك ادىستەمەلەرمەن ءبولىسۋ الاڭى رەتىندە كومەگى مول ەكەندىگىن «سالاۋاتتى تاماقتانۋ مەكتەبى» باعدارلاماسىنىڭ استانا جانە الماتى قالالارى بويىنشا ۇيلەستىرۋشىلەرى: استانا اكىمدىگىنىڭ ادىستەمەلىك ورتالىعىنىڭ ادىسكەرى روزا شاياحانوۆا، الماتى قالاسى ءبىلىم باسقارماسى ءقببجتعا ورتالىعىنىڭ ءبولىم باستىعى تاتيانا ەجوۆا جەڭىمپازداردى ماراپاتتاۋ سالتاناتىندا اتاپ ءوتتى.

2013 جىلدان باستاپ «سالاۋاتتى تاماقتانۋ مەكتەبى» باعدارلاماسىن جۇزەگە اسىرۋعا اتسالىسىپ وتىرعان الماتى، استانا قالالارىنىڭ پەداگوگتەرى وقۋشىلارىن دۇرىس تاماقتانۋ مادەنيەتىنە تاربيەلەۋدە. باعدارلاما 6-8 جاستاعى بالالارعا باعىتتالعان جانە مۇعالىمدەر وتكىزەتىن ساباقتار جۇيەسى ارقىلى جۇزەگە اسىرىلادى. ول قازاق تاماقتانۋ اكادەمياسىمەن جانە «ورلەۋ باۇو» اق بىرلەسىپ ازىرلەندى. باعدارلاما شەڭبەرىندە 60 000-عا جۋىق بالا «سالاۋاتتى تاماقتانۋ مەكتەبىمەن» تانىستى. وسىنداي ەڭبەك ناتيجەسىنىڭ قورىتىندىسى ىسپەتتى باعدارلاما ادىستەرىنىڭ بايقاۋى مۇعالىمدەر اراسىندا ۇلكەن قىزىعۋشىلىق تۋدىرۋدا.