بايعالي ەسەنالييەۆ، اكتەر، دراماتۋرگ، كومپازيتور:  وزگەرىستى قالاساق، ءوزىمىز ءۇن قوسۋىمىز كەرەك

مەن تاڭەرتەڭ ەرتەمەن ساعات 8.00 كەزىندە №542 سايلاۋ ۋچاسكەسىنە بارىپ داۋىس بەردىم. مەن بارعان كەزدە حالىقتىڭ قاراسى سيرەكتەۋ ەدى، ءبىراق وزگە ۇلت وكىلدەرىنىڭ بەلسەندىلىگىن بايقادىم. تۇسكە قاراي كوشەدە داۋىس بەرۋگە اعىلىپ بارا جاتقان حالىقتى كورىپ قۋانىپ قالدىم. بۇكىل ەل بولىپ اتا زاڭىمىزعا وزگەرىستەردىڭ ەنگىزىلۋىن ءبىر اۋىزدان قۇپتاۋىمىز كەرەك. كۇللى الەم، زامانا وزگەرىسكە بەت بۇرعان كەزدە ءبىزدىڭ مەملەكەت تە، حالقىمىز دا وزگەرىسكە ءۇن قاتقانىمىز ءجون. وسى ۋاقىتقا دەيىن بىزدەن ەشكىم قانداي وزگەرىس كەرەك، بولاشاققا دەگەن باعدارىمىز قانداي بولۋ كەرەك دەپ سۇراعان جوق، كەڭەسكەن ەمەس،  بيلىك باسىنداعىلار ءوز بىلگەنىن جاسادى. ەندى  مىنە، ەلىمىزدىڭ بولاشاعىن حالىق بولىپ بىرگە قۇراتىن ۋاقىت كەلدى. وسىندايدا اركىم نەمقۇرايلىلىق تانىتپاي، جاۋاپكەرشىلىكتى سەزىنۋى ءتيىس دەپ ەسەپتەيمىن. «اتا زاڭىمىزعا وزگەرىستەر ەنگىزۋ قاجەت پە؟» دەگەن ساۋالعا «ءيا» نەمەسە «جوق» دەپ جاۋاپ بەرۋ ءۇشىن ۋاقىتتى قيىپ، اركىم ءوز ازاماتتىق بورىشىن نەگە ورىنداماسقا. ەرىنشەكتىك، نەمقۇرايلىلىق ءبىزدى قۇردىمعا كەتىرەدى. ويتكەنى بۇل ءبىزدىڭ ءومىرىمىز، تاعدىرىمىز، بولاشاعىمىز!