بۇگىن الماتى قالاسى ءماسليحاتىنىڭ دەپۋتاتتارى مەن قوعامدىق كەڭەس مۇشەلەرى، سونداي-اق، ق ر وقۋ-اعارتۋ مينيسترلىگىنىڭ بالالاردىڭ قۇقىعىن قورعاۋ كوميتەتىنىڭ، الماتى قالاسى جانە الماتى وبلىسى ءبىلىم باسقارمالارىنىڭ وكىلدەرى «باعاناشىل» شاعىناۋدانىنداعى «ارنايى الەۋمەتتىك قىزمەتتەرگە مۇقتاج بالالاردى قولداۋ وبلىستىق ورتالىعى» كمم ۇجىمىمەن جەكە كەزدەسۋ وتكىزدى.
كەزدەسۋدە بالالار ءۇيىنىڭ جۇمىسىنا قاتىستى وزەكتى ماسەلەلەر تالقىلاندى.
ورتالىقتىڭ قىزمەتكەرلەرىنە الماتى وبلىسىنان الماتى قالاسى باسقارماسىنا قاراستى ۇيىمعا اۋىستىرىلىپ، ەڭبەك قۇقىعى ساقتالىپ، قولدانىستاعى زاڭناماعا سايكەس ەڭبەك شارتتارى قايتا راسىمدەلەتىندىگى جانە بۇل جەكە جازباشا كەلىسىم ارقىلى جۇزەگە اسىرىلاتىنى جەتكىزىلدى.
بالالار ءۇيى قىزمەتكەرلەرىن جۇمىستان بوساتۋ تۋرالى اقپارات شىندىققا سايكەس كەلمەيدى.
سونداي-اق، «باعاناشىل» بالالار ءۇيىنىڭ تاربيەلەنۋشىلەرى ءوز ورتالىعىنىڭ اۋماعىندا تۇرا بەرەدى جانە الماتى قالاسىندا ءبىلىم الادى.
بالالاردىڭ قاۋىپسىزدىگىن جانە ولارعا لايىقتى جاعداي جاساۋدى قامتاماسىز ەتۋ – قالا اكىمدىگىنىڭ جانە وقۋ-اعارتۋ مينيسترلىگىنىڭ باستى باسىمدىعى. جاعداي تۇراقتى باقىلاۋدا بولادى.