Aqshamnews.kz رەداكسياسى "كۇن سانى" ايدارىندا اپتا ىشىندە بولعان ەڭ وزەكتى وقيعالارعا شولۋ ۇسىندى.
قازاقستاندا 75 جاڭا ماماندىق پايدا بولدى
ءقازىر جاڭا ماماندىقتار اتلاسىندا مينيسترلىك جەتەكشىلىك ەتەتىن سالالار بويىنشا 75 جاڭا ماماندىق بار. بۇل تۋرالى ۇكىمەت وتىرىسىندا ونەركاسىپ جانە قۇرىلىس ۆيسە-مينيسترى يران شارحان مالىمدەدى.
"مىسالى، مەتاللۋرگيا جانە تاۋ-كەن ءوندىرىسى سالاسىندا سمارت جۇيەلەردى ازىرلەۋشى، روبوتتاندىرىلعان تاۋ تەحنيكاسىنىڭ وپەراتورى، ماشينا جاساۋ سالاسىندا – ۆيرتۋالدى پروتوتيپتەۋشى مامانى، قۇرىلىستا – Big Data تالداۋشىسى، "اقىلدى ءۇي" جوبالاۋشىسى سياقتى جاڭا ماماندىقتار پايدا بولدى. سونىمەن قاتار، بيزنەس پروسەستەردى اۆتوماتتاندىرۋعا بايلانىستى 40-تان استام ماماندىق وزگەرەدى"، - دەدى يران شارحان.
ۇكىمەت قىزىلوردا وبلىسىنداعى ەگىن القاپتارىن سۋمەن قامتۋعا 1 ملرد تەڭگە ءبولدى.
پرەزيدەنت قاسىم-جومارت توقايەۆتىڭ اگرارلىق سەكتوردى تۇراقتى تۇردە سۋمەن قامتاماسىز ەتۋ بويىنشا بەرگەن تاپسىرماسىن ىسكە اسىرۋ اياسىندا ۇكىمەت رەزەرۆىنەن قىزىلوردا وبلىسىنىڭ قاجەتتىلىكتەرى ءۇشىن 53 جىلجىمالى ديزەلدى سورعى ستانساسىن ساتىپ الۋعا شامامەن 1 ملرد تەڭگە ءبولىندى. ق ر پرەمەر-مينيسترى ولجاس بەكتەنوۆ ءتيىستى قاۋلىعا قول قويدى.
وڭىردە 126،4 مىڭنان استام گەكتار جەرگە سۋارمالى ەگىن ەگىلگەن، ونىڭ 82،4 مىڭ گەكتارى كۇرىش. اعىمداعى سۋارۋ ماۋسىمىندا جوسپارلانعان سۋ كولەمى 2،5 ملرد تەكشە مەتر.
جىل اياعىنا دەيىن 175 جاڭا جولاۋشىلار ۆاگونىن ساتىپ الۋ جوسپارلانىپ وتىر.
پرەمەر-مينيستردىڭ ءبىرىنشى ورىنباسارى رومان سكليار ۇكىمەتتە وتكەن باسپا ءسوز كونفەرەنسياسىندا ەلىمىزدە ءبىرقاتار ءىرى تەمىرجول جوباسى ىسكە اسىرىلىپ جاتقانىن ايتتى.
ماسەلەن، "دوستىق – مويىنتى" جانە "الماتى قالاسىنىڭ اينالما جولى" جوبالارى اياقتالۋ ساتىسىندا. كەلەسى جىلى "مويىنتى – قىزىلجار"، "داربازا – ماقتاارال" جوبالارى اياقتالادى. ال 2027 جىلى "باقتى – اياگوز" جوباسى ىسكە قوسىلادى.
استاناداعى دجەي لونىڭ كونسەرتىنە 25 مىڭنان اسا ادام بيلەت العان.
دجەننيفەر لوپەستىڭ استاناداعى كونسەرتىنە 25 مىڭنان استام كورەرمەن كەلمەك. ونىڭ 15 مىڭنان استامى شەتەلدىك تۋريستەرگە بۇيىرعان. بۇل تۋرالى كونسەرت ۇيىمداستىرۋشىلارى ايتتى.