الماتىدا دەمالىس كۇنگى جارمەڭكەلەر جەلىسى كەڭەيىپ، المالى جانە جەتىسۋ اۋداندارىندا جاڭا ساۋدا الاڭدارى اشىلادى. دەمالىس كۇنگى جارمەڭكەلەردىڭ ۇيىمداستىرۋشىسى — «الماتى» الەۋمەتتىك-كاسىپكەرلىك كورپوراسياسى («الماتى» اكك) — بۇل يگى باستامانىڭ اياسىن ودان ءارى ۇلعايتىپ، قالانىڭ ءار تۇكپىرىن قامتىپ كەلەدى، - دەپ حابارلايدى اqshamnews.kz.
تامىز ايىنان باستاپ المالى اۋدانىندا جاڭا جارمەڭكە الاڭى جۇمىس ىستەي باستايدى. سونداي-اق، جەتىسۋ اۋدانىندا دا جاڭا ساۋدا ورنى اشىلادى.
بۇگىندە دەمالىس كۇنگى جارمەڭكەلەر الماتىنىڭ المالى، اۋەزوۆ، بوستاندىق، مەدەۋ جانە الاتاۋ سىندى بەس اۋدانىندا تۇراقتى تۇردە ءوتىپ كەلەدى. جاڭا الاڭداردىڭ ىسكە قوسىلۋى قالا تۇرعىندارىنا فەرمەرلەر مەن جەرگىلىكتى وندىرۋشىلەردەن تابيعي ءارى جاڭا ونىمدەردى دەلدالسىز، قولجەتىمدى باعامەن ساتىپ الۋعا مۇمكىندىك بەرەدى.
قازىرگى تاڭدا جارمەڭكەلەرگە 328 اۋىل شارۋاشىلىعى ءوندىرۋشىسى ونىمدەرىن ۇسىنىپ وتىر. مۇندا جاڭا پىسكەن كوكونىستەر مەن جەمىستەردەن باستاپ، ەت جانە ءسۇت ونىمدەرى، نان-توقاش بۇيىمدارى، بال، كەپتىرىلگەن جەمىستەر مەن ارا شارۋاشىلىعى ونىمدەرىنە دەيىن مول تاڭداۋ بار.
بارلىق ءونىم الماتى وبلىسىنىڭ قاراساي، ىلە، تالعار، جامبىل جانە ەڭبەكشىقازاق اۋداندارىنداعى فەرمەرلىك جانە جەكە شارۋاشىلىقتاردان، سونداي-اق، الماتىنىڭ جەتكىزۋشىلەرىنەن كەلىپ تۇسەدى.
ورتا ەسەپپەن العاندا، ءبىر دەمالىس كۇنىندە جارمەڭكەلەردە 800 توننادان استام ءونىم ساۋدالانادى. ساۋدا سەنبى جانە جەكسەنبى كۇندەرى ساعات 09:00-دەن 18:00-گە دەيىن وتەدى:
• المالى اۋدانى — ماسانچي كوشەسى (ايتەكە بي جانە گوگول كوشەلەرىنىڭ اراسى)؛
• اۋەزوۆ اۋدانى — وتەگەن باتىر كوشەسى (اباي داڭعىلىنىڭ تومەنگى جاعىندا)؛
• بوستاندىق اۋدانى — قازاقفيلم شاعىناۋدانى (ءال-فارابي داڭعىلىنىڭ جوعارعى بەتكەيىندە)؛
• مەدەۋ اۋدانى — مەڭدىقۇلوۆ بۋلۆارى مەن بەكتۇروۆ كوشەسىنىڭ قيىلىسى؛
• الاتاۋ اۋدانى — «مادەنيەت» تۇرعىن ءۇي كەشەنى.
جارمەڭكەلەردى اپتا سايىن 45 مىڭنان استام الماتىلىق پەن قالا قوناقتارى كەلەدى.
دەمالىس كۇنگى جارمەڭكەلەردە ءوز ءونىمىن جاڭا ۇسىنعىسى كەلەتىندەر +7 701 555 5457 نومىرىنە (ءانۋار) حابارلاسا الادى.