قازاقستاندا كەيبىر بازار باسشىلارى ساۋداگەرلەرگە جەكە تالاپتارىن قويىپ، باعانى وزدەرى قوياتىنى انىقتالدى، دەپ حابارلايدى almaty-akshamy.kz
«ەلىمىزدە بولشەك ساۋداعا باقىلاۋ ءبىراز جىلداردان بەرى جۇرگىزىلمەي كەلەدى. سونىمەن قاتار نارىقتاعى ساۋدا ۇستەماقىسىنا دا باقىلاۋ جوق. ونىڭ ۇستىنە، بولشەك ساۋدامەن اينالىساتىن كەيبىر ءىرى بازارلار نارىق باعاسىمەن ساناسپايدى. وسى ارادا بولشەك ساۋدا نارىعىندا دەلدالدار پايدا بولىپ جاتىر. ولاردىڭ پايدا بولۋى باعاعا تىكەلەي اسەر ەتەدى. سول سياقتى، ءۇيدىڭ جانىندا اشىلعان ازىق-تۇلىك دۇكەندەرى تاۋارلاردى ءدال وسى بولشەك ساۋدا بازارلارى مەن قويمالاردان الادى»، - دەدى ق ر ساۋدا جانە ينتەگراسيا مينيسترلىگى ساۋدا كوميتەتى ءتوراعاسىنىڭ ورىنباسارى ايدار ابىلدابەكوۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، دۇكەن، بازار جانە باسقا ساۋدا نۇكتەلەرىندە زاڭبۇزۋشىلىقتى بايقاعان جاعدايدا جەرگىلىكتى اتقارۋشى ورگاندارعا جۇگىنگەن ءجون.
«انىقتالعانداي، ەلىمىز بويىنشا كەيبىر ساۋدا بازارلارىنداعى ورىنعا شەكتەۋ قويىلعان. ودان بولەك، بازار باسشىلارى باعانى وزدەرى بەلگىلەيتىن جاعداي دا بار. ياعني، بازار باسشىلارى ساۋداگەرلەرگە ءوز تالاپتارىن جۇرگىزەتىن كورىنەدى. وسىعان وراي ءىرى بولشەك ساۋدا بازارلارى مەن قويما باسشىلارىنا، ەگەر تۇتىنۋشىلاردان شاعىم تۇسسە جوسپاردان تىس تەكسەرۋ جۇرەتىنىن ەسكەرتكىم كەلەدى»، - دەيدى ول.