الماتىدا اكىمدىك پەن سىبايلاس جەمقورلىققا قارسى ءىس-قيمىل اگەنتتىگىنىڭ بىرلەسكەن جۇمىسىنىڭ ناتيجەسىندە مەكتەپ اسحانالارى ءۇشىن جوعارى باعامەن مەملەكەتتىك ساتىپ الۋ توقتاتىلدى
ناۋرىزباي اۋدانىنىڭ تۇرعىندارىمەن كەزدەسۋ بارىسىندا مەكتەپ اسحانالارىنا ارنالعان جابدىقتاردى ساتىپ الۋ تۋرالى سۇراققا جاۋاپ بەرە وتىرىپ، الماتى اكىمى ەربولات دوسايەۆ ق ر سىبايلاس جەمقورلىققا قارسى ءىس-قيمىل اگەنتتىگىمەن بىرلەسكەن قالا اكىمدىگىنىڭ جۇمىسى اياسىندا بيۋدجەت قاراجاتىن ۇتىمسىز جۇمساۋعا جول بەرىلمەگەنىن حابارلادى.
«بۇل تەرگەۋ ناتيجەسىندە ەمەس، پريەۆەنسيا اياسىندا اكىمدىك پەن انتيكوردىڭ بىرلەسكەن جۇمىسىنىڭ ارقاسىندا انىقتالدى. تەكسەرۋدەن كەيىن 20 مەكتەپتىڭ جابدىقتارىن ساتىپ الۋ توقتاتىلدى»، - دەدى اكىم ءارى رەسپۋبليكا بويىنشا وسىنداي تەكسەرۋلەر جۇرگىزىلگەنىن اتاپ ءوتتى. 1،9 ملرد تەڭگە كولەمىندەگى قاراجات بيۋدجەتكە قايتارىلدى. وتكەن جىلعا تالداۋ جۇرگىزىلۋدە، ءبىراق اسىرا سىلتەۋ فاكتىلەرى جوق.
سونىمەن قاتار، اكىم اتاپ وتكەندەي، بۇگىندە مەملەكەتتىك ساتىپ الۋ سالاسىندا ۇسىنىلاتىن تاۋارلار مەن قىزمەتتەردىڭ، ونىڭ ىشىندە الەۋمەتتىك ماڭىزى بار وبەكتىلەردىڭ ساپاسىنا سايكەسسىزدىك ماسەلەسى وزەكتى بولىپ قالا بەرەدى.
«وكىنىشكە وراي، قازىرگى مەملەكەتتىك ساتىپ الۋ جۇيەسى جوسىقسىز جەتكىزۋشىلەرگە قاتىسۋعا مۇمكىندىك بەرەدى. «باعا مەن ساپا» قاعيداسى ءاردايىم جۇمىس ىستەمەيدى، ياعني ارزان ءاردايىم ساپالى بولا بەرمەيدى. مەن بۇعان قارسىمىن. 2025 جىلعى 1 قاڭتاردان باستاپ مەملەكەتتىك ساتىپ الۋ تۋرالى جاڭا زاڭ كۇشىنە ەنەدى، ول بويىنشا ءبىز جەتكىزۋشىلەر مەن ولاردىڭ تاۋارلارى تالاپتارعا ساي بولادى دەپ كۇتەمىز. سونداي - اق، مەملەكەتتىك ساتىپ الۋعا قاتىسۋشىلاردىڭ جاۋاپكەرشىلىگى ارتادى»، - دەدى اكىم.