قالا تۇرعىندارى الەۋمەتتىك ماڭىزى بار ونىمدەرگە باعانىڭ ورىنسىز كوتەرىلۋىنە كۋا بولسا، قايدا جۇگىنە الادى؟
الماتى قالاسى بويىنشا Amanat پارتياسىنىڭ جانىنان قۇرىلعان تەكسەرىس توبى الەۋمەتتىك ماڭىزى بار ونىمدەردىڭ باعاسىنا مونيتورينگ جۇرگىزدى.
الماتى قالاسى بويىنشا Amanat پارتياسىنىڭ جانىنان قۇرىلعان تەكسەرىس توبى SMALL سۋپەرماركەتتەر جەلىسىندەگى الەۋمەتتىك ماڭىزى بار ونىمدەردىڭ باعاسىنا مونيتورينگ جاسادى.
«ءبىزدىڭ مونيتورينگ جۇرگىزۋدەگى ماقساتىمىز – قانداي دا ءبىر قىسىم كورسەتۋ ەمەس، كاسىپكەرلەردى بارلىق كەرەك-جاراقپەن قامتاماسىز ەتىپ، ولارعا جاعداي جاساۋ ارقىلى الماتىلىقتاردىڭ قولىنا تۇسەتىن تۇپكى ءونىمنىڭ ساپالى ءارى قولجەتىمدى بولۋىنا اسەر ەتۋ. ءبىزدىڭ بۇعان دەيىنگى تەكسەرۋ جۇمىستارىمىز ءۇش اي بۇرىن بولعان. سول ۋاقىتتان بەرى الەۋمەتتىك ماڭىزى بار ونىمدەردىڭ ءبىرشاماسىندا باعا وزگەرمەگەن. ءبىراق، وكىنىشكە قاراي، ەت ونىمدەرىنىڭ باعاسى وسكەنىن بايقادىق. ولار ءبىز ۇسىنعان باعادان الدەقايدا جوعارى. ناقتى ايتساق، 800 تەڭگەگە قىمباتتاعان. دەگەنمەن، تاۋىق ەتىنە، ءسۇت ونىمدەرى مەن جۇمىرتقاعا قويىلعان باعادا تۇراقتىلىق بار»، – دەدى Amanat پارتياسى جانىنداعى ەكونوميكا جانە كاسىپكەرلىكتى دامىتۋ كوميتەتىنىڭ وكىلى ەدۋارد كاتەنوۆ.
سونداي-اق، ول الەۋمەتتىك ماڭىزى بار ونىمدەردىڭ باعاسىنا وڭ اسەر ەتۋ ءۇشىن كاسىپكەرلەرمەن جەكەلەي جۇمىس جۇرگىزىلەتىنىن اتاپ ءوتتى.
«پياز باعاسى دا ءبىز ۇسىناتىن باعادان جوعارى. ايتىلعان ماسەلە ءبىزدى الاڭداتادى. قالامىزعا پياز نەگىزىنەن الماتى وبلىسىنان اكەلىنەدى. جالپى، ورتا باعا 80 تەڭگە بولسا، مۇندا 370 تەڭگەدەن ساتىلادى ەكەن. بۇل ماسەلەنى شەشۋ ءۇشىن لوگيستيكا تۇرعىسىنان نە كاسىپكەرلەرمەن تىكەلەي بايلانىس ورناتۋ سىندى شەشىم جولدارىن قاراستىرامىز. الماتى قالاسى كاسىپكەرلىك جانە ينۆەستيسيالار باسقارماسىمەن جانە ۇلتتىق كاسىپكەرلەر پالاتاسىنىڭ وكىلدەرىمەن كەزدەسىپ، ماسەلەنىڭ تۋىنداۋ سەبەبىن جانە ونى شەءشۋدىڭ قانداي جولدارى بار ەكەنىن تالقىلايمىز. الماتىلىقتار قولجەتىمدى باعادا ازىق-تۇلىك الۋ ءۇشىن ارتىق الىپساتارلىقتى ازايتۋعا تىرىسامىز. جالپى، كەشەندى جۇمىس جۇرگىزىلەدى»، – دەدى ول.
الماتى قالاسى كاسىپكەرلىك جانە ينۆەستيسيالار باسقارماسىنىڭ وكىلى راقىمجان ءارىپجانوۆ ءونىم وندىرۋشىلەرمەن مەموراندۋم جاسالعانىن حابارلادى.
«باعا قولجەتىمدىلىگىن قامتاماسىز ەتۋ ءۇشىن ونىمدەردى تىكەلەي جەتكىزۋ بويىنشا جۇمىس جۇرگىزىلىپ جاتىر. مىسالى، الماتى اكىمدىگىنىڭ وكىلدەرى تۇركىستان وبلىسىنا ارنايى جۇمىس ساپارىمەن بارىپ، بىرنەشە اۋىلشارۋشالىق مەكەمەلەرىمەن مەموراندۋمعا قول قويىپ كەلدى. ولار ماۋسىمارالىق كەزەڭدە، ياعني مامىر مەن ماۋسىم ايلارىنىڭ ارالىعىندا قالامىزعا كوكونىستەردى جەتكىزەدى. جالپى، قالادا جان-جاقتى جۇمىس جۇرگىزىلىپ جاتىر. ايتا كەتكەن ءجون، ەگەر قالا تۇرعىندارى الەۋمەتتىك ماڭىزى بار ونىمدەرگە باعانىڭ ورىنسىز كوتەرىلۋىنە كۋا بولسا، كاسىپكەرلىك جانە ينۆەستيسيالار باسقارماسىنا جۇگىنە الادى»، – دەدى الماتى قالاسى كاسىپكەرلىك جانە ينۆەستيسيالار باسقارماسىنىڭ وكىلى ر.ءارىپجانوۆ.