الماتى قالاسىندا ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەر ۇجىمدىق بىتىمگەرشىلىك كۇشتەرىنىڭ اسكەري قىزمەتشىلەرىن شىعارىپ سالدى
كەڭەس وداعىنىڭ باتىرى، حالىق قاھارمانى، ارميا گەنەرالى ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ ساپتىق الاڭىندا وتكەن بىتىمگەرشىلىك كونتينگەنتتەردى شىعارىپ سالۋ راسىمىنە ۇقشۇ-نىڭ باس حاتشىسى ستانيسلاۆ زاس، قازاقستان رەسپۋبليكاسى قورعانىس ءمينيسترىنىڭ ورىنباسارى، گەنەرال-مايور مۇحامەدجان تالاسوۆ، الماتى قالاسىنىڭ اكىمى باقىتجان ساعىنتايەۆ قاتىستى، دەپ حابارلايدى Almaty-akshamy.kz.
ۇقشۇ ۇجىمدىق بىتىمگەرشىلىك كۇشتەرى توبىنىڭ قولباسشىسى، گەنەرال-پولكوۆنيك اناتوليي سەرديۋكوۆ بارلىق جەكە قۇرامعا باتىل شەشىمدەرى مەن اسكەري بورىشىن ءمىنسىز ورىنداعاندارى ءۇشىن شىنايى العىسىن ءبىلدىردى.
سونىمەن قاتار، قولباسشى قازاقستان قورعانىس مينيسترلىگىنىڭ باسشىلىعىنا كوپۇلتتى بىتىمگەرشىلىك كونتينگەنتىنىڭ تۇرمىس-تىرشىلىگىن قامتاماسىز ەتۋ ماسەلەلەرىن شەشۋگە كومەكتەسكەنى ءۇشىن ريزاشىلىعىن ءبىلدىردى.
قالا اكىمى باقىتجان ساعىنتايەۆ ۇقشۇ-عا قاتىسۋشى بارلىق مەملەكەتتەر پرەزيدەنت ق.-ج. توقايەۆتىڭ كونستيتۋسيالىق ءتارتىپتى ورناتۋعا جانە تەرروريستىك قاۋىپ-قاتەردى جەڭۋگە جاردەمدەسۋ ءۇشىن بىتىمگەرشىلىك كونتينگەنتىن تارتۋ تۋرالى ۇندەۋىن ءبىراۋىزدان قولداعانىن ەسكە سالدى.
– بۇل كۇندەرى بىتىمگەرلەر اۋقىمدى جۇمىس اتقاردى. ءبىرىنشى كەزەكتە ماڭىزدى مەملەكەتتىك جانە ستراتەگيالىق وبەكتىلەردىڭ كۇزەتى مەن قورعانىسىن كۇشەيتۋ بويىنشا بەكىتىلگەن ۋچاسكەلەردە قۇقىقتىق ءتارتىپتى ساقتاۋعا كومەك كورسەتىلدى. مۇنىڭ ءبارى الماتىداعى جاعدايدى تۇراقتاندىرۋدا ۇلكەن ءرول اتقاردى، – دەپ اتاپ ءوتتى ب. ساعىنتايەۆ.
قالا اكىمىنىڭ ايتۋىنشا، بۇگىندە قالانىڭ تىنىس-تىرشىلىگىنىڭ بارلىق سالالارىن قالپىنا كەلتىرۋ جۇمىستارى قارقىندى جۇرگىزىلۋدە.
قازاقستان رەسپۋبليكاسى قورعانىس ءمينيسترىنىڭ ورىنباسارى، گەنەرال-مايور مۇحامەدجان تالاسوۆ قارۋلى كۇشتەردىڭ جوعارعى باس قولباسشىسى – ەل پرەزيدەنتى قاسىم-جومارت كەمەل ۇلى توقايەۆ ۇيىمعا مۇشە مەملەكەتتەردىڭ باسشىلارىنا ەلدەگى جاعدايدى تۇراقتاندىرۋعا جاردەمدەسۋ ءۇشىن بىرىككەن بىتىمگەرشىلىك كونتينگەنتىن ەنگىزۋ تۋرالى ءوتىنىش جاساعانىن اتاپ ءوتتى.
– سىزدەر ستراتەگيالىق جانە باسقا دا ماڭىزى بار نىسانداردى كۇزەتۋدى قامتاماسىز ەتتىڭىزدەر. بىتىمگەرشىلىك كونتينگەنت كەلىپ قازاقستاندىق اسكەري قىزمەتشىلەر، ىشكى ىستەر قىزمەتكەرلەرى سودىرلاردى ىزدەستىرۋ جانە ۇستاۋ بويىنشا وزدەرىنىڭ تىكەلەي مىندەتتەرىنە كىرىسە الدى، – دەدى م. تالاسوۆ.
قازاقستان قورعانىس ءمينيسترىنىڭ اتىنان ۇجىمدىق بىتىمگەرشىلىك كۇشتەرى كونتينگەنتىنىڭ اسكەري قىزمەتشىلەرىنە العىس ءبىلدىرىلدى.
ءبىرقاتار بىتىمگەرلەر ق ر قورعانىس ءمينيسترىنىڭ بۇيرىعىمەن «حالىقارالىق ىنتىماقتاستىققا قوسقان ۇلەسى ءۇشىن» مەدالدارىمەن جانە گراموتالارمەن ماراپاتتالدى.
ۇجىمدىق قاۋىپسىزدىك كەڭەسىنىڭ شەشىمىنە سايكەس، ۇقشۇ ۇجىمدىق بىتىمگەرشىلىك كۇشتەرى قازاقستان رەسپۋبليكاسىندا مەملەكەتتىك، اسكەري جانە الەۋمەتتىك ماڭىزى بار نىسانداردى كۇزەتۋ جونىندەگى مىندەتتەردى ورىندادى.
دوستىق جانە اسكەري ىنتىماقتاستىق قاعيداتتارىن باسشىلىققا الا وتىرىپ، كونستيتۋسيالىق ءتارتىپتى قالپىنا كەلتىرۋ بويىنشا باۋىرلاستىق كومەك رەتىندە ارمەنيا رەسپۋبليكاسى، بەلارۋس رەسپۋبليكاسى، قىرعىزستان رەسپۋبليكاسى، رەسەي فەدەراسياسى مەن تاجىكستان رەسپۋبليكاسى ەل اۋماعىنا وزدەرىنىڭ سانى 2 030 ادام مەن 250 بىرلىك تەحنيكانى قۇرايتىن اسكەري كونتيگەنتتەرىن جىبەردى.
ۇيىم بويىنشا وداقتاستار تەرروريستىك شابۋىل كەزىندە قازاقستانعا قولداۋ جانە ۋاقتىلى كومەك كورسەتتى. بىتىمگەرلەردىڭ ماڭىزدى نىسانداردى كۇزەتكە الۋى قارۋلى كۇشتەردىڭ، قۇقىق قورعاۋ ورگاندارىنىڭ كۇشتەرى مەن قۇرالدارىنىڭ ەداۋىر بولىگىن بوساتۋعا جانە ولاردى تەرروريستەرگە قارسى كۇرەسكە جىبەرۋگە مۇمكىندىك بەردى.
وسىنداي جاعدايدا ۇجىمدىق قاۋىپسىزدىك تۋرالى شارت ۇيىمىنىڭ تيىمدىلىگى ايقىن كورىندى.
ۇقشۇ بىرىككەن بىتىمگەرشىلىك كونتينگەنتىن ەلدەن كەزەڭ-كەزەڭىمەن شىعارۋ، قازاقستان پرەزيدەنتى بەلگىلەگەن مەرزىمگە سايكەس، بيىل 13 قاڭتاردان باستاپ جۇزەگە اسىرىلادى.