بۇل تۋرالى الماتى اكىمى باقىتجان ساعىنتايەۆ مەملەكەت باسشىسىنىڭ زارداپ شەككەن بيزنەستى قالپىنا كەلتىرۋ جانە قالانى ودان ءارى دامىتۋ تۋرالى تاپسىرمالارىن ورىنداۋ بويىنشا قالا اكتيۆىندە سويلەگەن سوزىندە حابارلادى.
ب. ساعىنتايەۆتىڭ ايتۋىنشا، وتكەن جىلى الماتىداعى جۇمىسسىزدىق 5،1%-عا دەيىن تومەندەگەن، دەپ حابارلايدى Almaty-akshamy.kz
بۇل جۇمىس جالعاستىرىلاتىن بولادى.
بيىل ۇلتتىق جوبالار اياسىندا 13،2 مىڭ جۇمىس ورنى قۇرىلادى، بيزنەستى قولداۋدىڭ وڭىرلىك شارالارى 3،6 مىڭ بيزنەس قۇرۋعا مۇمكىندىك بەرەدى، 31 مىڭنان استام ورىن قۇرۋدى جوسپارلاپ وتىر.
قالالىق باعدارلامالار شەڭبەرىندە اكك قۇرالدارى ارقىلى 2%-بەن جەڭىلدىكپەن كرەديت بەرۋ مۇمكىندىگىمەن سەگىزگە قوسىمشا 5 شاعىن ونەركاسىپتىك پارك ىسكە قوسىلادى.
«جاستاردى كاسىپتىك تەحنيكالىق دايارلاۋدى جانە جۇمىسسىزداردى قايتا وقىتۋدى كۇشەيتىپ، كەيىننەن جۇمىسقا ورنالاستىرامىز. جەكە سەكتوردان جۇيەلىك وپەراتورلاردى تارتۋ ارقىلى بىلىكتى جۇمىس ورىندارى قۇرىلادى»، - دەپ اتاپ ءوتتى الماتى اكىمى.
2 جىل ىشىندە «كاسىپ الاڭى»، «الماتى بيزنەس» باعدارلامالارى بويىنشا كاسىپكەرلىك نەگىزدەرىنە وقىتۋ، 200 مىڭعا جۋىق ادامدى قامتيتىن Qolday كاسىپكەرلىك ورتالىعىنىڭ كۋرستارى جۇرگىزىلدى. بۇل جۇمىس ىستەپ تۇرعان شوب سانىنىڭ 4%-عا نەمەسە 2021 جىلدىڭ قورىتىندىسى بويىنشا 7،6 مىڭ بىرلىككە ۇلعايۋىنا اسەر ەتتى.
ب. ساعىنتايەۆ بولاشاقتا ەكونوميكانىڭ ءتۇرلى سالالارىنداعى قاجەتتىلىكتەردى بولجاۋ ءۇشىن جاڭا ماماندىقتاردىڭ وڭىرلىك اتلاسى ازىرلەنەتىنىن اتاپ ءوتتى.
«وتكەن جىلدان باستاپ ءبىز اۋدانداردىڭ مىقتى جاقتارىن باعدارلاي وتىرىپ، كلاستەرلىك ءتاسىلدى قولدانا باستادىق جانە جەتەكشى ۋنيۆەرسيتەتتەردى - سۇلەيمان دەميرەل ۋنيۆەرسيتەتىن، الما ۋنيۆەرسيتەتىن، قبتۋ، حاتۋ-دى اۋدانداردىڭ ستراتەگيالىق دامۋىنا جۇمىلدىردىق»، - دەدى الماتى اكىمى.
وسىنىڭ بارلىعى يننوۆاسيالىق جوبالاردى دامىتۋ ءۇشىن جاڭا جاعدايلار جاساۋعا جانە جاڭا كاسىبي قۇزىرەتتەر مەن جاڭا جۇمىس ورىندارىنا قاجەتتىلىكتى قالىپتاستىرا وتىرىپ، ءاربىر اۋداندى كۇشەيتۋگە مۇمكىندىك بەرەدى.
«مەملەكەت باسشىسىنىڭ تاپسىرماسى بويىنشا اعىمداعى جىلدان باستاپ جاستار پراكتيكاسى بويىنشا جالاقى 25-تەن 30 اەك-كە دەيىن ۇلعايتىلدى. ءبىز ءوز تاراپىمىزدان جەرگىلىكتى بيۋدجەتتەن قوسىمشا 10 اەك-كە تولەمدى ۇلعايتامىز، وسىلايشا جالاقى 122،5 مىڭ تەڭگەنى قۇرايدى»، دەپ اتاپ ءوتتى ب. ساعىنتايەۆ.
جۇمىس ىستەيتىن مۇگەدەكتەر ءۇشىن الەۋمەتتىك جۇمىس ورىندارىن سۋبسيديالاۋ مولشەرى 63 مىڭنان 92 مىڭ تەڭگەگە دەيىن ۇلعايتىلادى.
جالپى، بارلىق شارالاردىڭ ارقاسىندا كەمىندە 50 مىڭ جۇمىس ورنى قۇرىلادى.