الماتى اكىمى باقىتجان ساعىنتايەۆ «الماتى» تەلەارناسىنداعى ونلاين-تانىستىرىلىم بارىسىندا مەگاپوليستەگى جول ينفراقۇرىلىمىن دامىتۋ، جاڭا جولداردى جوندەۋ جانە سالۋ تۋرالى ايتتى، دەپ حابارلايدى Almaty-akshamy.kz.
قالانىڭ اۋماعى تاريحي جاعىنان الماتى وبلىسىنىڭ ىرگەلەس اۋداندارىنىڭ ەسەبىنەن ۇلعايدى. قازىرگى تاڭدا، 2021 جىلعى مالىمەتكە سايكەس، قالاداعى جولداردىڭ جالپى ۇزىندىعى - 3097 شاقىرىم. الماتى جولدارىنىڭ ۇلەسى رەسپۋبليكانىڭ بارلىق قالا ىشىندەگى جولدارىنىڭ بەستەن ءبىر بولىگىن (17،3%) قۇرايدى.
كۇن سايىن قالادا 700 مىڭنان استام كولىك جۇرۋدە، 1 ميلليوننان استام ادام قاتىنايدى. ماگيسترالدى كوشەلەردىڭ ۇزىندىعى 531 كم نەمەسە 17%، اۋداندىق ماڭىزى بار كوشەلەر – 594 كم نەمەسە 19%، جەرگىلىكتى كوشەلەر -1972 كم نەمەسە 64%-دى قۇرايدى.
بۇگىندە جەرگىلىكتى ماڭىزداعى 298،5 كم كوشە بار، نەگىزىنەن قالاعا قوسىلعان شاعىن اۋدانداردا ءارى ولارعا اسفالتتى بەتون توسەلمەگەن. جاقسى جانە قاناعاتتانارلىق جاعدايداعى جولداردىڭ ۇلەسى 80%-دان (2477 كم) اسادى.
2020 جىلى ۇزىندىعى 219 كم بولاتىن 324 كوشەگە ورتاشا جوندەۋ جۇرگىزىلدى، 86،6 كم تروتۋارلار جانە 40-تان استام ايالدامالار مەن قالتالار جوندەلىپ، اباتتاندىرىلدى.
Vision Zero تۇجىرىمداماسىن ىسكە اسىرۋ ماقساتىندا مولداعالييەۆ، مامەتوۆا جانە ايتييەۆ كوشەلەرىنىڭ بويىندا 14 تراپەسيا ءتارىزدى جاساندى كەدەرگىلەر مەن 102 ءقاۋىپسىز قۇرىلعىلار جاسالدى.
74 مىڭ ادام تۇراتىن 8 شاعىن اۋداندا 42،8 كم جاڭا جول سالىندى. ولار – دارحان-بايبەسىك، العاباس-ازتم، ۇلجان-1، ۇلجان-2، ايگەرىم-1، ايگەرىم-2، ترۋدوۆيك، شاڭىراق-2 شاعىن اۋداندارى.