ساۋدا جانە ينتەگراسيا ءبىرىنشى ۆيسە-مينيسترى ارمان شاققالييەۆ ارزان ازىق-تۇلىكتى قايدان الۋعا بولاتىنىن ايتتى، دەپ حابارلايدى Almaty-akshamy.kz.
ونىڭ ايتۋىنشا، ول ءۇشىن ەڭ الدىمەن باقىلاۋ-كاسسالىق اپپاراتتارىمەن جابدىقتالعان ءىرى ساۋدا جەلىلەرىنە بارعان ءجون.
«سەبەبى، باعاعا قاتىستى كۇمان تۋىنداعان جاعدايدا، تەك چەك ارقىلى ۋاكىلەتتى ورگاندار مەن ساۋدا دەپارتامەنتىنە جۇگىنە الادى. وسىلايشا، باعانى ءوسىرۋ فاكتىسىن راستاۋعا نەمەسە جوققا شىعارۋعا بولادى. وركەنيەتتى ساۋدا فورماتى بويىنشا تاۋارلاردى ساتىپ الۋ ورىندارى وتە ماڭىزدى. بۇل الەۋمەتتىك ماڭىزى بار تاۋارلارعا دا قاتىستى»، - دەدى ۆيسە-مينيستر ورتالىق كوممۋنيكاسيالار قىزمەتىندەگى بريفينگتە.
سونداي-اق، ا. شاققالييەۆ ەلىمىزدە كەيبىر ازىق-تۇلىك باعاسى تومەندەگەنىن ايتتى.
«سوڭعى اپتاداعى دەرەكتەردى تالداۋ ناتيجەسى كەيبىر ازىق-تۇلىك باعاسىنىڭ تۇسكەنىن كورسەتىپ وتىر. قاراقۇمىق، قانت، كارتوپ، كۇنباعىس مايىنىڭ باعاسى تومەندەدى. جالپى، ەلىمىز بويىنشا 0،7-دەن 2،2%-عا دەيىن ارزانداۋ بايقالادى. ەگەر ءبىز تاۋار نومەنكلاتۋراسى بويىنشا باسقا توپتاعى تاۋارلار تۋرالى ايتار بولساق، ارينە، بارلىق جەردە باعانىڭ تومەندەۋى جوق. ءبىراق، ءوسۋ بار»، - دەيدى ول.
ايتا كەتەيىك، 19 ساۋىردە ۇكىمەتتىڭ كەڭەيتىلگەن وتىرىسىندا پرەزيدەنت توقايەۆ ەلىمىزدە ينفلياسيا سوڭعى 15 جىلدا بولماعان دەڭگەيگە جەتكەنىن ايتىپ، ۇكىمەت مۇشەلەرىنىڭ باعانى ۇستاپ تۇرۋعا باعىتتالعان قادامدارىنان ەش ناتيجە جوعىن مالىمدەدى.
«جۇرتتىڭ اي سايىن جۇمسايتىن قارجىسىنىڭ تەڭ جارتىسىنان كوبى ازىق-تۇلىك الۋعا كەتەدى. ۇكىمەتتىڭ ارەكەتى جەتكىلىكسىز بولىپ وتىر. تىيىم سالۋ جانە شەكتەۋ شارالارى ۋاقىتشا عانا اسەر ەتەدى. مۇنداي قادامدار قيىندىقتىڭ بەتىن قايتارسا دا، ودان ءبىرجولا قۇتىلۋعا مۇمكىندىك بەرمەيدى، ءتىپتى، ماسەلەنى ۋشىقتىرادى دەۋگە بولادى»، – دەدى مەملەكەت باسشىسى.
سونداي-اق، كۇنى كەشە ءماجىلىس دەپۋتاتى ەلنۇر بەيسەنبايەۆ حالىقتىڭ ورتاشا تابىسى مەن قىمباتشىلىق جايلى رەسمي ستاتيستيكا شىندىققا ساي كەلمەيتىنىن ايتتى.