ق ر مادەنيەت جانە سپورت مينيسترلىگى «ايبوز» ۇلتتىق ادەبي سىيلىعىنا شىعارمالاردى قابىلداۋدى باستادى. ادەبي سىيلىقتىڭ جالپى جۇلدە قورى – 35 ملن تەڭگە. ءار نوميناسياعا 5 ملن تەڭگەدەن قاراستىرىلعان، دەپ حابارلايدى Almaty-akshamy.kz مادەنيەت جانە سپورت مينيسترلىگىنە سىلتەمە جاساپ.
ۇلتتىق سىيلىققا «ۇزدىك پروزا»، «ۇزدىك پوەزيا»، «ۇزدىك دراما»، «ۇزدىك ادەبي اۋدارما»، «ۇزدىك بالالار ادەبيەتى»، «ۇزدىك ادەبي سىن»، «ۇزدىك كوميكس» نوميناسيالارى بويىنشا شىعارمالار قابىلدانادى. بايقاۋعا وتاندىق قالامگەرلەر قاتىسا الادى جانە ۇمىتكەرلەردىڭ جاس ەرەكشەلىگىنە بايلانىستى شەكتەۋ جوق.
ۇمىتكەرلەر وتىنىمدەرىن 2023 جىلعى 1 مامىر – 1 قىركۇيەك ارالىعىندا www.aiboz.kz سايتى ارقىلى جىبەرۋ قاجەت. ادەبي سىيلىق جىل سوڭىندا تابىستالادى.
««ايبوز» – وتاندىق قالامگەرلەرگە مەملەكەت تاراپىنان قولداۋ كورسەتۋ جانە ىنتالاندىرۋ ماقساتىندا مادەنيەت جانە سپورت مينيسترلىگى ۇيىمداستىراتىن ۇلتتىق ادەبي سىيلىق. بايقاۋعا بۇرىن-سوڭدى ەش جەردە جاريالانباعان شىعارمالار عانا قابىلدانادى. بۇل قازاق ادەبيەتىنىڭ قورى 7 نوميناسيا بويىنشا جۇزدەگەن جاڭا تۋىندىلارمەن تولىعادى دەگەن ءسوز. سونداي-اق قالامگەرلەر اراسىندا باسەكە پايدا بولىپ، سونىڭ ناتيجەسىندە وقىرمانعا وزەكتى، قىزىقتى ءارى زاماناۋي شىعارمالار جول تارتادى»،- دەدى ق ر مسم ارحيۆ، قۇجاتتاما جانە كىتاپ ءىسى كوميتەتى كىتاپ ءىسى باسقارماسىنىڭ باسشىسى الماز مىرزاحمەت.