زاڭناماعا ءتيىستى تۇزەتۋلەر مەملەكەتتىك ورگانداردىڭ قاراۋىندا.
ق ر پرەمەر-مينيسترى اسقار مامين ۇكىمەتتىڭ سيفرلىق كەڭسەسىندە ورتالىق مەملەكەتتىك ورگاندار باسشىلارىنىڭ جانە وڭىرلەر اكىمدەرىنىڭ قاتىسۋىمەن الەۋمەتتىك ماڭىزى بار ازىق-تۇلىك تاۋارلارىنا (ءامات) جانە جانار-جاعارماي ماتەريالدارىنا (ججم) باعانى رەتتەۋ ماسەلەسى جونىندە كەڭەس وتكىزدى، دەپ حابارلايدى Almaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ.
قازىرگى جاعداي مەن جۇرگىزىلىپ جاتقان جۇمىس تۋرالى ساۋدا جانە ينتەگراسيا ءمينيسترى باقىت سۇلتانوۆ، اۋىل شارۋاشىلىعى ءمينيسترى ەربول قاراشوكەيەۆ، يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ، ەنەرگەتيكا ۆيسە-مينيسترى اسەت ماعاۋوۆ، «قازمۇنايگاز» ۇك» اق باسقارما ءتوراعاسى اليك ايداربايەۆ، باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك جۇمانعارين، نۇر-سۇلتان قالاسىنىڭ اكىمى التاي كولگىنوۆ، اقتوبە وبلىسىنىڭ اكىمى وڭداسىن ورازالين، قىزىلوردا وبلىسىنىڭ اكىمى گۇلشارا ءابدىقالىقوۆا، قاراعاندى وبلىسى جەڭىس قاسىمبەك جانە ت.ب. باياندادى. وتكەن اپتادا الەۋمەتتىك ماڭىزى بار ازىق-تۇلىك تاۋارلارى باعاسىنىڭ ءوسۋى 0،2% قۇرادى. بۇعان جۇمىرتقانىڭ 2،7%-عا قىمباتتاۋى اسەر ەتتى. جۇمىرتقا باعاسىنىڭ ەڭ كوپ ءوسۋى ماڭعىستاۋ (21،8%)، شىعىس قازاقستان (16،6%) جانە اقتوبە (12،1%) وبلىستارىندا تىركەلدى. «اينالىم سحەماسى» شەڭبەرىندە وڭىرلەردە 167،7 مىڭ توننا الەۋمەتتىك ماڭىزى بار تاۋارلار ساتىپ الىندى. ەڭ كوپ جاسالعانى نان (41 مىڭ توننا)، كارتوپ، ۇن جانە قانت (71،6 مىڭ توننا) قورى بولدى. كۇنباعىس مايىن، قاراقۇمىق، سيىر ەتى مەن قىرىققاباتتى ساتىپ الۋعا قارجىلاندىرۋ ۇلعايتىلاتىن بولادى. نان باعاسىنىڭ وسۋىنە جول بەرمەۋ ماقساتىندا بيىلعى جىلدىڭ سوڭىنا دەيىن وڭىرلىك تۇراقتاندىرۋ قورلارىنان ينتەرۆەنسيالار جۇزەگە اسىرىلادى، ال كەيىننەن «ازىق-تۇلىك كەلىسىم شارت كورپوراسياسى» ۇك» اق-دان ارزانداتىلعان بيداي ساتىپ الۋ ارقىلى جۇزەگە اسادى. زاڭناماعا ءتيىستى تۇزەتۋلەر مەملەكەتتىك ورگانداردىڭ قاراۋىندا. ىشكى نارىقتى ديزەل وتىنىمەن قامتاماسىز ەتۋ ءۇشىن اۆتوموبيل كولىگىمەن مۇناي ونىمدەرىن تاسىمالداۋعا تىيىم سالىندى، ا.ج. ءساۋىر ايىنان باستاپ ديزەل وتىنىنىڭ ەكسپورتى توقتاتىلدى، اتىراۋ موز-ىندە جوسپارلى جوندەۋ جۇمىستارى 2022 جىلعا اۋىستىرىلدى، ا. ج. 1 قىركۇيەكتەن 5 قازانعا دەيىن رف-دان 55،9 مىڭ توننا ديزەل وتىنى يمپورتتالدى جانە باسقا دا شارالار قابىلداندى. پاۆلودار مۇناي-حيميا زاۋىتىنىڭ مۇنايدى باستاپقى وڭدەۋ كەشەنىن جوندەۋ مەرزىمىن 1 قازاننان 9 قازانعا اۋىستىرۋ قوسىمشا 30 مىڭ توننا ديزەل وتىنىن وندىرۋگە مۇمكىندىك بەردى. جوندەۋ جۇمىستارىن اياقتاۋ اعىمداعى جىلدىڭ 4 قاراشاسىنا جوسپارلانعان. جىل باسىنان بەرى ەلىمىزدە 78 ملن توننا كومىر ءوندىرىلدى. كوممۋنالدىق-تۇرمىستىق قاجەتتىلىكتەر مەن تۇرعىندار ءۇشىن كومىر ونىمدەرىنىڭ قاجەتتىلىك جوسپارىنا سايكەس 2021-2022 جىلدارعا ارنالعان تۇتىنۋ كولەمى شامامەن 9،2 ملن تونناعا جۋىقتى قۇرايدى، ونىڭ ىشىندە 2،8 ملن تونناسى – كوممۋنالدىق-تۇرمىستىق سەكتوردا، 6،4 ملن تونناسىن تۇرعىندار تۇتىنادى. بۇگىندە اكىمدىكتەر 7،5 ملن توننا كومىر اكەلدى، بۇل كوممۋنالدىق-تۇرمىستىق سەكتور قاجەتتىلىگىنىڭ 93،1%-ىن جانە حالىقتىڭ قاجەتتىلىگىنىڭ 76%-ىن قامتاماسىز ەتەدى. وتكەن اپتادا باسەكەلەستىكتى قورعاۋ جانە دامىتۋ اگەنتتىگى شىمكەنت قالاسىندا، اقمولا، سولتۇستىك قازاقستان، الماتى، پاۆلودار، اقتوبە جانە جامبىل وبلىستارىندا 87 تاۋار پوزيسياسى بويىنشا ساۋدا ۇستەمەسىن كوتەرۋدىڭ 16 فاكتىسىن انىقتادى. مونوپولياعا قارسى باقىلاۋ اياسىندا ديزەل وتىنى نارىعىندا باعانى تومەندەتۋ تۋرالى 19 حابارلاما شىعارىلدى. مۇناي بازالارىن، كوتەرمە جانە بولشەك ساۋدا جەتكىزۋشىلەرىن ديزەل وتىنىن وتكىزۋدى شەكتەۋدىڭ نەگىزدىلىگى جانە ونى ق ر اۋماعىنان تىس جەرگە شىعارۋ مۇمكىندىگى تۇرعىسىنان تەكسەرۋ باستالدى. پرەمەر-مينيستر وڭىرلەردىڭ اكىمدەرىنە تۇراقتاندىرۋ قورلارىن ازىق-تۇلىكپەن تولىقتىرۋ جانە «اينالىم» سحەماسىنا قاراجات ءبولۋ جونىندەگى جۇمىستى جانداندىرۋدى، ساۋدا سۋبەكتىلەرىنىڭ ساۋدا ۇستەمەسىن بۇزۋى فاكتىلەرى بويىنشا دەرەۋ شارالار قابىلداۋدى، حالىقتىڭ جانە كوممۋنالدىق-تۇرمىستىق سەكتوردىڭ قاجەتتىلىكتەرى ءۇشىن ۇزدىكسىز كومىر جەتكىزۋدى قامتاماسىز ەتۋدى تاپسىردى. ۇكىمەت باسشىسى الەۋمەتتىك ماڭىزى بار ازىق-تۇلىك ونىمدەرىنىڭ باعاسىن ۇستاپ تۇرۋ بويىنشا جۇيەلى جۇمىس جۇرگىزۋدىڭ جانە ينفلياسياعا قارسى دەن قويۋ شارالارىنىڭ كەشەنىن ءتيىمدى ىسكە اسىرۋدىڭ ماڭىزدىلىعىن اتاپ ءوتتى.