الماتى بيلىگى الەۋمەتتىك ماڭىزى بار ازىق-تۇلىك تاۋارلارىنىڭ باعاسىنىڭ ءوسۋىن تەجەۋ ماقساتىندا جۇمىس ىستەپ جاتىر، دەپ حابارلايدى aqshamnews.kz
2025 جىلدىڭ 9 ايىندا ءامات باعاسىنىڭ ءوسىمى 8،4%-دى قۇرادى، بۇل ورتاشا رەسپۋبليكالىق دەڭگەيدەن (8،1%) ءسال عانا جوعارى.
جاعدايدى تۇراقتاندىرۋ ءۇشىن جەرگىلىكتى بيۋدجەتتەن 12 ملرد تەڭگە ءبولىنىپ، ونىڭ 8،3 ملرد تەڭگەسى وندىرۋشىلەردەن تىكەلەي بايلانىسىپ، Magnum ساۋدا جەلىسىندە باعانى بەكىتۋگە جۇمسالدى. وڭىرلىك كوممۋنيكاسيالار قىزمەتىندە قالا اكىمىنىڭ ورىنباسارى ولجاس سماعۇلوۆ وسىلاي دەپ حابارلادى.
ونىڭ ايتۋىنشا، الەۋمەتتىك ماڭىزى بار 19 ءتۇرلى تاۋار بويىنشا بارلىعى 26 مىڭ توننا ونىمگە كەلىسىم-شارت جاسالعان. الماتىعا وندىرۋشىلەردەن تىكەلەي ۇلكەن كولەمدە ءونىم ۇزبەي جەتكىزىلىپ وتىرادى. سونىمەن قاتار، قىس-كوكتەم مەزگىلىندە كوكونىسكە بايلانىستى ءىرى جەتكىزۋشىلەرمەن مەموراندۋمدارعا قول قويىلدى. قاراشا ايىنان باستاپ كەلەر جىلعى مامىر ايىنا دەيىن 14 مىڭ توننادان استام ءونىم ۇلكەن ساۋدا جەلىلەرىنە جول تارتادى. بۇل كۇن سۋىق كەزدە تاپشىلىق پەن باعانىڭ اياق استى قىمباتتاپ كەتۋنىڭ الدىن الۋعا سەپ بولماق.
«ءبىز ءۇشىن باسىم باعىت – الەۋمەتتىك ماڭىزى بار ازىق-تۇلىك باعاسى. بۇل ءار وتباسىنىڭ كۇنكورىسىنە تىكەلەي اسەر ەتەتىنىن جاقسى تۇسىنەمىز، سوندىقتان جۇيەلى عانا ەمەس، جەدەل ارەكەت ەتەمىز»، – دەپ اتاپ ءوتتى ولجاس سماعۇلوۆ.
جەرگىلىكتى جانە وڭىرلىك وندىرۋشىلەرمەن بىرلەسىپ جۇيەلى جۇمىس جۇرگىزىلىپ جاتىر، بۇل دەلدالداردى اينالىپ ءوتىپ، الىپساتارلىقتى ازايتادى.
مۇنداي ءتاسىل قالانىڭ ازىق-تۇلىك قاۋىپسىزدىگىنىڭ تۇراقتى جۇيەسىن قالىپتاستىرىپ، ازىق-تۇلىكتى ارزانداۋ باعامەن جەتكىزىپ وتىرۋعا مۇمكىندىك بەرەدى.