ءازىربايجان مينيسترلەر كابينەتى رەسەي ازاماتتارىنىڭ ەل اۋماعىندا بولۋ تارتىبىنە وزگەرىستەر ەنگىزدى. جاڭارتىلعان ەرەجەلەر ۇكىمەتتىڭ رەسمي سايتىندا جاريالانىپ، 2025 جىلعى 1 قاڭتاردان باستاپ كۇشىنە ەنەدى، دەپ حابارلايدى aqshamnews.kz
«ءازىربايجان رەسپۋبليكاسىنا ۆيزاسىز كەلگەن رەسەي ازاماتتارى مەن رەسەي فەدەراسياسىندا تۇراقتى تۇراتىن ازاماتتىعى جوق تۇلعالاردىڭ ۋاقىتشا تۇرۋ مەرزىمى ءبىر كۇنتىزبەلىك جىل ىشىندە 90 كۇننەن اسپاۋى ءتيىس»، – دەلىنگەن قۇجاتتا.
قۇجاتقا ەلدىڭ پرەمەر-مينيسترى الي اسادوۆ قول قويعان.
بۇل وزگەرىستەر رەسەي تاراپىنان بۇرىن ەنگىزىلگەن ۇقساس وزگەرىستەرگە جاۋاپ رەتىندە قابىلداندى. 26 جەلتوقساندا رەسەيدىڭ سىرتقى ىستەر مينيسترلىگىنىڭ سايتىندا شەتەل ازاماتتارىنىڭ ەلدە ۋاقىتشا تۇرۋ مەرزىمىن جىلىنا 90 كۇنگە دەيىن قىسقارتۋ تۋرالى حابارلاما جاريالانعان بولاتىن.
ءازىربايجاننىڭ سىرتقى ىستەر مينيسترلىگى ەلدىڭ كوشى-قون ساياساتىندا ءوزارا جانە تەڭدىك قاعيداتتارىن ۇستاناتىنىن، وسى نەگىزدە جاڭا ەرەجەلەر قابىلدانعانىن مالىمدەدى.