استانادا 8-14 قىركۇيەكتە وتەتىن V دۇنيەجۇزىلىك كوشپەندىلەر ويىندارىنا ءازىربايجان بەلسەندى تۇردە قاتىسادى.
بۇل تۋرالى قازاقستان رەسپۋبليكاسىنىڭ ءازىربايجانداعى ەلشىسى ءالىم بايەل مەن ءازىربايجان رەسپۋبليكاسىنىڭ جاستار جانە سپورت ءمينيسترى فاريد گايبوۆتىڭ كەزدەسۋىندە ايتىلدى، دەپ حابارلايدى Almaty-akshamy.kz
كەزدەسۋ بارىسىندا ءالىم بايەل 2024 جىلعى 8-14 قىركۇيەكتە استانادا وتەتىن V دۇنيەجۇزىلىك كوشپەندىلەر ويىندارى تۋرالى اقپارات بەردى.
ديپلومات جارىستارعا الەمنىڭ ونداعان ەلدەرىنىڭ وكىلدەرى قاتىساتىنىن، ويىندار اياسىندا 20 جارىس جانە 10 كورمەلىك سايىستاردى وتكىزۋ جوسپارلانعانىن اتاپ ءوتتى. ولاردىڭ قاتارىندا ات جارىستارى، ۇلتتىق جەكپە-جەك تۇرلەرى، ءداستۇرلى زياتكەرلىك ويىندار، ساداق اتۋ، ساياتشىلىق، حالىق ويىندارى جانە ت.ب. بار.
قازاق ديپلوماتى وسى اۋقىمدى شاراعا ءازىربايجاننىڭ قاتىسۋىنىڭ ماڭىزدىلىعىن اتاپ ءوتىپ، ءمينيستردى وعان ارنايى قوناق بولۋعا شاقىردى. سونىمەن قاتار، قازاقستان ەلشىسى بۇل ءىس-شارا تۇركى مەملەكەتتەرى ۇيىمىنا قازاقستان ءتوراعالىعىنىڭ اياسىندا وتەتىنىن جانە كەزەكتى رەت بۇكىل تۇركى الەمىن بىرىكتىرەتىنىن اتاپ ءوتتى. ءىس-شارا تۇركى حالىقتارىنىڭ بىرەگەي داستۇرلەرىن ناسيحاتتاۋ جانە ولاردى ساقتاۋ بويىنشا شارالارعا سەرپىن بەرەدى.
فاريد گايبوۆ قازاقستانعا شاقىرۋدى ريزاشىلىقپەن قابىلداپ، ءازىربايجاننىڭ كەزەكتى دۇنيەجۇزىلىك كوشپەندىلەر ويىندارىنا بەلسەندى تۇردە قاتىساتىنىن مالىمدەدى. سۇحبات بارىسىندا ف. گايبوۆ قازاقستان ەلشىسىنە مينيسترلىكتىڭ جاستار ساياساتى سالاسىنداعى جۇمىسى جانە سپورتتى دامىتۋ سالاسىنداعى ءبىرقاتار تابىستى جوبالارى تۋرالى دا اقپارات بەردى. مينيستر جاڭا سپورت نىساندارىن سالۋ جانە ەسكى سپورت نىساندارىن قالپىنا كەلتىرۋ جۇمىستارى جۇرگىزىلىپ جاتقانىن اتاپ ءوتتى. قازاق سپورتشىلارى دا ءازىربايجاندا وتكىزىلەتىن ءىس-شارالارعا بەلسەندى اتسالىسۋدا.
كەزدەسۋ سوڭىندا تاراپتار ەكى ەلدىڭ جاستار ساياساتى مەن سپورت سالاسىنداعى ىنتىماقتاستىعىنىڭ ءارى قارايعى پەرسپەكتيۆالارىن تالقىلادى. اتاپ ايتقاندا، ءازىربايجان تاراپى قازاقستاننىڭ قىسقى سپورت تۇرلەرىن، ونىڭ ىشىندە حوككەيدى دامىتۋداعى تاجىريبەسىنە قىزىعۋشىلىق تانىتۋدا.