ءوزىنىڭ جانكۇيەرلەرىن 20 جىل كۇتتىرگەن فەستيۆال تۋرا بۇگىن، 28 شىلدەدە الماتىدا، «مەدەۋ» مۇز ايدىنىندا شىمىلدىعىن قايتا اشتى، دەپ حابارلايدى Almaty-akshamy.kz.
ءۇش كۇنگە جالعاساتىن مۋزىكالىق مەرەكەنىڭ اشىلۋ سالتاناتى جوعارى دەڭگەيدە ءوتتى. مادەني شارانىڭ اشىلۋىندا ق ر مادەنيەت جانە سپورت ءمينيسترى اسحات ورالوۆ قۇتتىقتاۋ ءسوزىن سويلەدى.
سونداي-اق، جوبانىڭ باستى جەتەكشىلەرى ءارى قولداۋشىلارى ارمانجان بايتاسوۆ پەن ءۇمىت شاياحمەتوۆا كورەرمەندەردى حالىقارالىق فەستيۆالمەن قايتا قاۋىشۋىمەن قۇتتىقتادى.
«مينيستر اسحات ورالوۆ سوزىندە: «ەلىمىزدە مادەني-الەۋمەتتىك شارالار قاشان دا جوعارى قولداۋعا يە. “ازيا داۋىسى” فەستيۆالى دە سونىڭ ءبىرى دەسەك قاتەلەسپەيمىز. ءوز كەزەگىندە ءىس-شارانى ۇيىمداستىرۋشىلارعا العىسىمدى ايتقىم كەلەدى. جالپى، دارىندى جاستاردى قولداۋعا ماقساتىندا قازاقستاندا جىلىنا 30-دان استام حالىقارالىق فەستيۆال وتكىزىلەدى. ولاردىڭ اراسىندا «جىبەك جولى وپەرا جانە بالەت» فەستيۆالى، ورتالىق ازيا ەلدەرىنىڭ تەاتر فەستيۆالى، «كوشپەلىلەر اۋەنى» سەكىلدى تانىمال جوبالاردى اتاۋعا بولادى. بارشاڭىزدى حالىقارالىق مۋزىكالىق فەستيۆالدىڭ سالتاناتتى اشىلۋىمەن قۇتتىقتايمىن»، – دەدى.
ازيانىڭ اسقاق ساحناسى ەڭ الدىمەن وتاندىق ونەر جۇلدىزدارىنا ءتيدى. ونەرپازداردىڭ كوشىن باستاپ ءان اڭىزى – بيبىگۇل تولەگەنوۆا ونەر جۇلدىزدارىنا جانە تاريحي فەستيۆالعا دەگەن باتاسىن بەردى. كەيىن ەلىمىزدە جانە شەتەلدە اۋقىمدى اۋديتورياعا يە جۇلدىزدارىمىز مولدانازار، RaiM، ەركە ەسماحان، V$XV PRINCE، ميراس جۇگىنىسوۆ، مارحابا ءسابي، ORYNKHAN، يرينا كايراتوۆنا، ZAQ قاتارلىلار ونەر كورسەتتى.
ايتا كەتەيىك، فەستيۆالدىڭ ءبىرىنشى كۇنىنە Green Case Event كومپانياسى جاۋاپتى بولىپ وتكىزۋدە.
اتالمىش، اۋقىمدى حالىقارالىق جوبا 1990 جىلى ءدال بۇگىنگى «مەدەۋ» سپورتتىق كەشەنىندە الەمگە ءوز داۋىسىن ەستىرتكەن بولاتىن. 2005 جىلعا دەيىن ۇدايى دامىعان جوبا الەمدىك مۋزىكا يندۋسترياسىنداعى ماڭىزدى وقيعاعا اينالعان. ەندى مىنە 20 جىلدىق ۇزىلىستەن كەيىن الاتاۋ بوكتەرىندە، الماتى تورىندەگى ءوزىنىڭ تاريحي ساحناسىندا قايتا جاڭىردى.
جوبانى حالىق بانكى Tan Media Group مەدياحولدينگىمەن بىرگە قايتا جانداندىرىپ وتىرعانىن ايتا كەتەيىك. وتاندىق بانك ءوزىنىڭ 100 جىلدىق مەرەي تويىنا وراي «100 يگى ءىس» اۋقىمدى اكسياسىن وتكىزۋدە.
شارا الداعى كۇندەردە دە جالعاسىن تابادى. ەرتەڭ ساحناعا الەمدىك جۇلدىزدار شىعادى دەپ كۇتىلۋدە.
