گروزنىي اۋەجايى ماڭىندا اپاتقا ۇشىراعان ازەربايجان ۇشاعىنىڭ بورتتىق جازبا قۇرىلعىلارىنان (FDR جانە CVR) الىنعان مالىمەتتەر اپات الدىنداعى جاعدايدى اشىپ كورسەتتى. بۇل تۋرالى Aqshamnews.kz سايتى حابارلايدى.
2024 جىلعى وقيعا كەزىندە ۇشاق 05:13:30 ۋاقىتىندا 3500 فۋت بيىكتىكتە اۆتوپيلوت رەجيمىندە قالىپتى جاعدايدا ۇشىپ بارا جاتقان. دۆيگاتەلدەر مەن گيدراۆليكالىق جۇيەلەردە اقاۋ تىركەلمەگەن، تەك GPS 1 جانە GPS 2 جۇيەلەرى سپۋتنيكتەن سيگنال قابىلداي الماعان.
الايدا 05:13:31-دە دىبىستىق جازبا قۇرىلعىسىنان (CVR) كۇتپەگەن قاتتى سوققى دىبىسى تىركەلىپ، اۆتوپيلوت پەن قوزعالتقىش تارتۋ اۆتوماتيكاسىنىڭ اجىراۋ دابىلى قوسىلعان. ءۇش سەكۋندتان كەيىن ۇشاقتىڭ ءۇشىنشى گيدروجۇيەسىندە قىسىم كۇرت تومەندەپ، سۇيىقتىق دەڭگەيى 0%-عا دەيىن ءتۇسىپ كەتكەن.
جازبادا ۇشقىش باسقارۋ تەتىكتەرىنىڭ (ەليەۆاتور، ەلەرون، رۋل) بەيتاراپ كۇيدە قالعانىن حابارلاپ، جاعداي سوڭىنا دەيىن وزگەرمەگەنىن كورسەتەدى. 05:13:36-دا تانگاج بويىنشا تريممينگ جۇيەسى ىستەن شىققان. وسى ساتتە كوماندير دابىل پانەلىندەگى "DOOR...SERVICE DOOR AFT OPEN" دەگەن حابارلامانى داۋىستاپ وقىعان.
05:13:39 ۋاقىتىندا كابينانىڭ قىسىمىن جوعالتۋ پروسەسى باستالعانى تىركەلدى. تەرگەۋ جالعاسىپ جاتىر، ال تۇپكىلىكتى قورىتىندى قوسىمشا ساراپتامالاردان كەيىن جاريالانادى.