پروپورسيونالدى جۇيە بويىنشا سايلاناتىن ءبىر پالاتالى پارلامەنتكە كوشۋ قازاقستاننىڭ ساياسي جۇيەسىن دامىتۋدىڭ قيسىندى جالعاسى بولىپ تابىلادى. بۇل تۋرالى ءماجىلىس دەپۋتاتى ازات پەرۋاشيەۆ كونستيتۋسيالىق رەفورما جونىندەگى كوميسسيانىڭ ءۇشىنشى وتىرىسىندا مالىمدەدى.
ول ءوزىنىڭ ساياسي پروسەستەرگە قاتىسۋ تاجىريبەسى نەگىزىندە «اق جول» دەموكراتيالىق پارتياسى مەملەكەت باسشىسىنىڭ ءبىر پالاتالى پارلامەنتكە كوشۋ جونىندەگى باستاماسىنا نىق قولداۋ بىلدىرگەنىن ەسكە سالدى.
ازات پەرۋاشيەۆتىڭ ايتۋىنشا، ەكى پالاتالى پارلامەنت – بۇل فەدەرالدىق مەملەكەتتىك قۇرىلىم ينستيتۋتى، وندا سەناتتىڭ مىندەتى –فەدەراسيا سۋبەكتىلەرىنىڭ زاڭناماسىن ۇسىنۋ جانە ۇيلەستىرۋ.
«قازاقستان ءبىرىڭعاي زاڭدارى مەن ەرەجەلەرى بار ۋنيتارلىق مەملەكەت بولىپ تابىلادى. ءبىز شەمونايحادان فورت- شيەۆچەنكوعا دەيىن، بەسكولدەن شارداراعا دەيىنگى ءارتۇرلى ايماقتارداعى ادامداردىڭ ءومىر ءسۇرۋ ساپاسى مەن مەملەكەتتىك قىزمەتتەرگە بىردەي كەپىلدىك بەرىلىپ، قورعالۋىنا ۇمتىلامىز. بۇل تۇرعىدا وڭىرلەر مەن ولاردىڭ تۇرعىندارىنىڭ مۇددەلەرى تەڭ دارەجەدە ساقتالۋى ءتيىس»، - دەدى ازات پەرۋاشيەۆ.
ول مەملەكەت باسشىسى بۇل باعىتتا 2022 جىلى قادام جاساعانىن ايتتى: سول كەزدە زاڭداردىڭ قابىلدانۋى ءماجىلىس قۇقىعىنا جاتقىزىلدى، ال سەناتقا زاڭ جوبالارىن ماقۇلداۋ نەمەسە ولارعا ۇسىنىستار ەنگىزۋ فۋنكسياسى بەرىلدى.
«سوندىقتان قاسىم-جومارت كەمەل ۇلى توقايەۆتىڭ قازىرگى باستاماسى كونستيتۋسيانىڭ دايەكتى ەۆوليۋسياسىنىڭ لوگيكاسىن كورسەتەدى. سونىمەن قاتار بۇل ءبىزدىڭ ساياسي جۇيەمىزدىڭ جانە ونىڭ ينستيتۋتتارىنىڭ جەتىلۋىن جەدەلدەتەدى»، – دەپ اتاپ ءوتتى ازات پەرۋاشيەۆ.
ونىڭ ايتۋىنشا، بۇگىنگى تاڭدا ءبىر پالاتالى پارلامەنتتىڭ مەملەكەتتىك بيلىك جۇيەسىندەگى وكىلەتتىگىن كۇشەيتۋ بويىنشا وڭتايلى شەشىمدەر ازىرلەندى.
سونىمەن قاتار، كونستيتۋسيادا ونىڭ مارتەبەسىن بەكىتە وتىرىپ، حالىق كەڭەسى جوعارى كونسۋلتاسيالىق ورگانىن قۇرۋ تۋرالى باستاما ءتۇرلى ەتنوستار وكىلدەرىنىڭ بيلىك جۇيەسىنە قاتىسۋىن 8 ەسە كەڭەيتەدى، وڭىرلەردىڭ مۇددەلەرىن ءبىلدىرۋدى بەكىتەدى جانە ازاماتتىق قوعام كوشباسشىلارىنىڭ ساياسي جۇيەگە تارتىلۋىن قامتاماسىز ەتەدى.
پارتيالىق تىزىمدەر بويىنشا پارلامەنت دەپۋتاتتارىن سايلاۋعا كوشۋ بولىگىندە بۇل ۇستانىم پارلامەنتاريزمنىڭ جيناقتالعان حالىقارالىق تاجىريبەسىن كورسەتەتىنىن اتاپ ءوتتى ازات پەرۋاشيەۆ.
ونىڭ پىكىرىنشە، پروپورسيونالدى جۇيە سايلانبالى ورگانداردا قوعام مۇددەلەرىنىڭ كەڭ وكىلدىگىن قامتاماسىز ەتەدى، مىقتى پارتيالاردىڭ وسۋىنە ىقپال ەتەدى جانە ساياسي پراكتيكاداعى ەۋروپالىق ترەندتەرگە سايكەس كەلەدى.
«ىسكە اسىرىلىپ جاتقان كونستيتۋسيالىق رەفورما – بۇل حالىقارالىق تاجىريبەگە جانە پارلامەنتتىك وپپوزيسيانىڭ كوپ جىلدىق تاجىريبەسىنە سۇيەنەتىن بۇكىل كونستيتۋسيالىق جۇيەنىڭ شىن مانىندە تەرەڭ قايتا جاڭعىرۋى»، – دەپ اتاپ ءوتتى ازات پەرۋاشيەۆ.