قازاقستاندىقتاردىڭ قارىزدان قۇتىلىپ، جاڭا ءومىر باستاۋىنا مۇمكىندىك بەرەتىن قر-نىڭ «ازاماتتاردىڭ تولەم قابىلەتتىلىگىن قالپىنا كەلتىرۋ جانە بانكروتتىعى تۋرالى زاڭى» الماتىدا ساتىمەن ىسكە اسىپ جاتىر، دەپ حابارلايدى aqshamnews.kz.
وندا حالىقتىڭ اسىرەسە الەۋمەتتىك وسال توبىنا كوپ كوڭىل بولىنگەن. وڭىرلىك كوممۋنيكاسيالار قىزمەتىندە وتكەن پرەسس-كونفەرەنسيادا الماتىنىڭ مەملەكەتتىك كىرىستەر دەپارتامەنتىنىڭ دارمەنسىز بورىشكەرلەرمەن جۇمىس باسقارماسىنىڭ باسشىسى ايدوس بۇدىعۇلوۆ وسىلاي دەدى.
«زاڭ اسىرەسە تابىسى از ازاماتتار مەن كوپ نەسيە الىپ، قيىن جاعدايعا تاپ بولعان حالىقتىڭ الەۋمەتتىك وسال توبىنا كوپ كوڭىل بولگەن. وسى زاڭنىڭ ارقاسىندا ولاردىڭ كوبى ۇزاق جىلدار بويى اۋىر جۇك بولىپ كەلگەن قارىزىنان قۇتىلۋعا مۇمكىندىك الىپ وتىر»،- دەيدى ايدوس بۇدىعۇلوۆ.
سوتتان تىس بانكروتتىق ءراسىمدى قۇجات جيناپ اۋرە بولماي-اق، بۇدان بىلاي ونلاين ارقىلى راسىمدەي بەرسە بولادى. بۇل قاعازباستىلىقتان قاتتى قينالاتىن قارت ادامدارعا دا پايدالى. ەندى وسىنىڭ ءبارىن «ەلەكتروندى ۇكىمەت» ارقىلى نەمەسە ءموبيلدى قوسىمشا ارقىلى تەز ءارى تەگىن ىستەي الاسىز.
سوت ارقىلى بانكروت دەپ تابىلعان جانە تولەمگە قابىلەتتىلىگىن قايتا قالپىنا كەلتىرۋ ماسەلەسى ودان دا كۇردەلى جاعدايدى قاراستىرعانىمەن، ءبىراق ول دا ازاماتتاردىڭ مۇمكىندىگىنە قارايدى. سوڭعىسى تۇراقتى تابىسى بار، سونىڭ ىشىندە زەينەتاقى تولەمدەرى بار ازاماتتار ءۇشىن ەرەكشە ماڭىزدى، ولار بەرەشەگىن ۋاقىتىلى تولەيتىندەردىڭ مارتەبەسىنەن ايىرىلعىسى كەلمەي، قارىزىن بىرتىندەپ، كەزەڭ-كەزەڭىمەن وتەيدى.
بىلتىر كۇشىنە ەنگەن زاڭداعى جاڭا تولىقتىرۋ ازاماتتاردىڭ مۇمكىندىگىن ودان ارى ارتتىردى. ەندى ۋاقىتىلى تولەيتىن، ءبىراق نەسيەسى كوبەيىپ كەتكەندەر دە وسى مۇمكىندىكتى پايدالانا الادى. سونىمەن بىرگە، تولەمگە قابىلەتتىلىگىن قالپىنا كەلتىرگەننەن كەيىن، شەتەلگە شىعۋىنا شەكتەۋ قويۋ جاعى دا الىنىپ تاستالادى. بۇل شەتەلدە تۋعان-تۋىسى بار ازاماتتارعا دا ءتيىمدى بولعالى تۇر.
وسىلايشا، زاڭ قارىزدان قۇتىلىپ، جاڭا ءومىر باستاعىسى كەلگەن قازاقستاندىقتاردى الەۋمەتتىك تۇرعىدا قولدايتىن قۇرالعا اينالدى.