تاڭنان بەرى حالىق سايلاۋعا اسا بەلسەندىلىك تانىتىپ جاتىر. الماتىلىقتاردىڭ كوڭىل-كۇيى كوتەرىڭكى. بارلىعى دا ءوز تاڭداۋلارىن جاساۋعا اسىعۋدا، دەپ حابارلايدى اlmaty-akshamy.kz.
بىرنەشە سايلاۋ ۋچاسكەلەرىن ارالاپ، سايلاۋ بارىسىمەن تانىستىق. داۋىس بەرەتىن ورىندار اسا ىجداحاتتىلىقپەن دايىندالعان. بارلىعى دا تالاپقا ساي. ال تاڭداۋ جاساۋعا كەلگەن حالىقتىڭ قاراسى باسىم. بارلىعى دا بولاشاق ءۇشىن ءوز تاڭداۋلارىن جاساۋدا. بارشاسى سايلاۋدىڭ ءادىل ءوتىپ جاتقانىنا ءدان رازى.
«حالىق اراسىندا جۇرگەندىكتەن، بيىلعى سايلاۋعا ازاماتتاردىڭ جاپپاي اتسالىسقانىن ايتپاۋ مۇمكىن ەمەس. ەلدىك شارا جوعارى دەڭگەيدە وتۋدە. ەشبىر زاڭ نەمەسە ءتارتىپ بۇزۋشىلىق كورگەن جوقپىن. سايلاۋ ناۋقانى وتە جاقسى ۇيىمداستىرىلعان. بۇل – ەڭ ءبىرىنشى، حالىقتىڭ بولاشاققا دەگەن سەنىمى مەن ءۇمىتى. سايلاۋعا قاتىسقان بارلىق كانديداتقا مۇمكىندىك پەن ەركىندىك بەرىلدى. سول كانديداتتاردىڭ باعدارلاماسى كوڭىلىمنەن شىققاندارىنا داۋىس بەرۋ ماقساتىندا ءوز تاڭداۋىمدى جاساۋ ءۇشىن كەلدىم. ايتىلعان ءسوز – اتىلعان وق. ەندىگى سايلاناتىن ازاماتتاردان حالىق زور ءۇمىت كۇتەدى. ايتقان ۋادەلەرىندە تۇرىپ، ولار سەنىمگە سەلكەۋ تۇسىرمەيدى دەگەن سەنىمدەمىن»، - دەيدى №123 قوجا احمەت ياسساۋي اتىنداعى مەكتەپتىڭ ءمۇعالىمى بەكبوسىنوۆا ايگۇل قاسىمحان قىزى.