جەتىسۋدا تاعى ءبىر گەمودياليز ورتالىعى ىسكە قوسىلدى. «تۋعان جەرگە تۋىڭ تىك» دەگەندەي، سارقان اۋدانى قاراۋىلتوبە اۋىلىندا تۋىپ-وسكەن ازاماتتىڭ مەسەناتتىق جاساۋىمەن سارقان اۋداندىق اۋرۋحانا بازاسىندا گەمودياليز ورتالىعى اشىلدى. وعان كاسىپكەر 60 ملن. تەڭگە جەكە ينۆەستيسيا سالعان، - دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.
سارقان اۋدانى اكىمدىگىنىڭ مالىمەتىنە قاراعاندا، كاسىپكەر ازامات دولانبايەۆ اۋداندىق اۋرۋحانانىڭ بوس تۇرعان ءۇي-جايىنىڭ شاعىن بولىگىنە جوندەۋ جۇمىستارىن جۇرگىزىپ، گەمودياليز قىزمەتى ءۇشىن ارنايى جابدىقتار اكەلىپ ورناتقان. ورتالىق ورنالاسقان الاڭنىڭ كولەمى – 85،2 شارشى مەتر. ورىندى جالعا الۋ اقىسى مەملەكەتتىك بيۋدجەتكە تولەنەدى.
وسىلايشا 19 مىڭ تۇرعىنى بار سارقان قالاسىندا بۇيرەكتىڭ سوزىلمالى جەتكىلىكسىزدىگى اۋرۋىنا شالدىققان ادامداردىڭ قانىن تازالاپ، قالىپتى ءومىر ءسۇرۋىن قامتاماسىز ەتەتىن ورتالىق ىسكە كىرىستى. بۇرىن سىرقاتتار گەمودياليز الۋ ءۇشىن سارقاننان 151 شاقىرىم جەردەگى وبلىس ورتالىعىنا قاتىنايتىن بولسا، ەندى ولارعا الىسقا جول تارتۋدىڭ قاجەتى جوق.
ورتالىقتىڭ اشىلۋىمەن تۇرعىنداردى اۋدان اكىمى عالىمجان مامانبيەۆ قۇتتىقتاپ، ەل جاندى ازاماتقا العىسىن ءبىلدىردى. ول ءوز سوزىندە وسى ۋاقىتقا دەيىن اۋداندا مۇنداي ورتالىق بولماعانىن، سوندىقتان سوزىلمالى بۇيرەك اۋرۋلارى بار ازاماتتاردىڭ تالدىقورعان قالاسىنا بارۋىنا تۋرا كەلگەنىن ايتتى.
- ادام ءومىرى - ەڭ قىمبات قۇندىلىق، دەنساۋلىق ەشقانداي اقشامەن ولشەنبەيدى. وسى رەتتە ازامات باۋىرىمىزدىڭ يگى ىسىنە العىس بىلدىرەمىن، - دەدى ع. مامانبايەۆ.
ورتالىقتا گەرمانيادا جاسالعان قۇرال-جابدىقتار ورناتىلعان. مۇندا ءبىر مەزگىلدە 4 ناۋقاس ەم قابىلداي الادى. مەديسينالىق قىزمەت تەگىن مەديسينالىق كومەكتىڭ كەپىلدەندىرىلگەن كولەمى اياسىندا ءمامس جۇيەسى ارقىلى تەگىن كورسەتىلەدى.
- ەمدەۋ پروسەسى ءار ادامعا اپتاسىنا 3 رەت جۇرگىزىلەدى. ءبىر سەانسقا شامامەن 4 ساعات جۇمسالادى. بۇگىنگى كۇنگە سارقان اۋدانىنان بولەك اقسۋ جانە الاكول اۋداندارىنىڭ جاقىن ايماقتارىنىڭ ناۋقاستارىن قوسا العاندا 10 ازامات ەم الىپ جاتىر، - دەيدى دارىگەر ولجاس بايجانوۆ. الماتى قالاسىنىڭ «Bios» كلينيكالىق بازاسىنان ارنايى ءبىلىم العان ول ارىپتەسى مۇرات بولەگەنوۆپەن بىرگە ورتالىقتا ناۋقاستارعا ارنايى مەديسينالىق كومەك كورسەتەدى.