دەنساۋلىق ساقتاۋ مينيسترلىگىنىڭ مالىمەتىنە سۇيەنسەك، بۇگىنگى كۇنى دارىلىك زاتتار مەن مەديسينالىق بۇيىمداردىڭ مەملەكەتتىك تىزىلىمىندە دارىلىك زاتتاردىڭ 6925 ساۋدا اتاۋى تىركەلگەن. ولاردىڭ اراسىندا كولىك قۇرالدارىن باسقارار الدىندا قولدانۋعا تىيىم سالىنعان قانداي دارىلەر بار. اlmaty-akshamy.kz ءتىلشىسى زەرتتەپ كوردى
سونىمەن، كولىك جۇرگىزەر الدىندا ورتالىق جۇيكە جۇيەسىنە اسەر ەتەتىن پرەپاراتتارعا تىيىم سالىنادى.
«اۆتوكولىكتى باسقارۋ نەمەسە جوندەۋ جۇمىستارى كەزىندە ميدىڭ ىستەۋ قابىلەتىنە اسەر ەتەتىن باسقا دا دارىلىك توپتار بار. كەيبىر دارى-دارمەكتەر كولىك جۇرگىزۋ قابىلەتىنە بىردەن اسەر ەتۋى مۇمكىن، كەيدە ونى قابىلداعاننان كۇننەن كەيىنگى كۇنى دە اسەرى تارقاماۋى مۇمكىن. بۇل اسەرلەر رەسەپت بويىنشا دا، رەسەپتسىز دە دارى-دارمەكتەردى قابىلداۋ كەزىندە پايدا بولۋى مۇمكىن. اسەرلەر كوبىنەسە الكوگولدى ءبىر مەزگىلدە قولدانعاندا نەمەسە باسقا دارى-دارمەكتەرمەن قوسىمشا ارەكەتتەسكەندە كۇشەيەدى. ناتيجەسىندە شارشاۋ، باس اينالۋ، كوزدىڭ الدى بۇلىڭعىرلانىپ نەمەسە كورۋ قابىلەتىنىڭ بۇزىلۋى، ۇيقى كەلتىرۋ، دەنەنى قۇرىستىرۋ جانە ت.ب. سياقتى بەلگىلەر پايدا بولۋى مۇمكىن»، - دەيدى دارىگەرلەر.
ولاردىڭ ايتۋىنشا، كوبىنەسە دارى-دارمەكتەردى قابىلداۋدان بولاتىن ءقاۋىپتى ەسكەرە بەرمەيدى.
«اسىرەسە، ەم الۋدى باستاعان كەزدە ساقتانعان ءجون. وعان دوزانىڭ وزگەرۋى نەمەسە دارى-دارمەكتىڭ وزگەرۋى اسەر ەتەدى. اۆتوكولىكتى باسقارۋ كەزىندە كەرى اسەر ەتۋى مۇمكىن كەيبىر دارىلىك توپتاردىڭ ءتىزىمى: انالگەتيكتەر (اۋىرسىنۋدى جەڭىلدەتۋ ءۇشىن قولدانىلاتىن دارىلەر)؛ انتيدەپرەسسانتتار (اۋىر دەپرەسسيالىق بۇزىلۋلاردى ەمدەۋ ءۇشىن قولدانىلاتىن دارىلەر)؛ ديابەتكە قارسى پرەپاراتتار (قانداعى گليۋكوزانى تومەندەتۋ ارقىلى قانت ديابەتىن ەمدەۋ ءۇشىن قولدانىلاتىن دارىلەر)؛ ەپيلەپسياعا قارسى پرەپاراتتار (ەپيلەپسيالىق ۇستامالاردى ەمدەۋ ءۇشىن قولدانىلاتىن دارىلەر)؛ انتيگيستاميندەر (اللەرگيانى ەمدەۋ ءۇشىن قولدانىلاتىن دارىلەر)؛ گيپەرتەنزياعا قارسى پرەپاراتتار (جوعارى قان قىسىمىن ەمدەۋ ءۇشىن قولدانىلاتىن دارىلەر)؛ انكسيوليتيكتەر (مازاسىزدىقتى ەمدەۋ ءۇشىن قولدانىلاتىن دارىلەر)؛ ۇيىقتاتاتىن دارىلەر (ۇيقى پروبلەمالارىن شەشۋ ءۇشىن قولدانىلاتىن دارىلەر)؛ انتيپسيحوتيكتەر"، - دەپ اتاپ ءوتتى دەنساۋلىق ساقتاۋ مينيسترلىگى.
سونىمەن قاتار، قازاقستان رەسپۋبليكاسى دەنساۋلىق ساقتاۋ مينيسترلىگىنىڭ مەديسينالىق جانە فارماسيەۆتيكالىق باقىلاۋ كوميتەتى قازىرگى ۋاقىتتا اۆتوكولىكتى جۇرگىزۋ كەزىندە مەديسينالىق دارىلەردى ىشۋگە تىيىم سالىنعان پرەپاراتتاردىڭ تولىق ءتىزىمى جوق ەكەنىن حابارلادى
"تىركەلگەن دارىلىك زاتتار بويىنشا اقپاراتتى ndda.kz سايتىنان جانە darikz ءموبيلدى قوسىمشاسىندا تانىسىپ شىعۋعا بولادى. سونىمەن قاتار، كولىك قۇرالىن باسقارۋ كەزىندە ىشۋگە تىيىم سالىنعان دارىلىك زاتتاردىڭ تىزبەسى جوق"، - دەپ تولىقتىردى ۆەدومستۆو. سونىمەن قاتار، ءاربىر دارى-دارمەكتىڭ قارسى كورسەتىلىمدەرىن مۇقيات وقىپ شىعۋعا كەڭەس بەردى.