جىل باسىنان بەرى ەلوردادا كولىكتەردىڭ ورتەنىپ كەتۋى كۇرت ارتتى.
استانا قالاسى توتەنشە جاعدايلار دەپارتامەنتىنىڭ ماماندارى قالا تۇرعىندارىنا جولدا ءجۇرۋ كەزىندە ءورت قاۋىپسىزدىگىن ساقتاۋ ەرەجەلەرىن ەسكە سالدى، دەپ حابارلايدى Almaty-akshamy.kz Elorda.info-عا سىلتەمە جاساپ.
كولىكتەردىڭ ورتەنۋىنە ەلەكتر سىمدارىنىڭ دۇرىس جۇمىس ىستەمەۋى جانە گاز باللوندى جابدىقتىڭ دۇرىس ورناتىلماۋى، سونداي-اق تەحنيكالىق تەكسەرۋدىڭ دۇرىس جۇرگىزىلمەۋى سەبەپ بولىپ وتىر.
وسىعان بايلانىستى ەلوردالىق تجد ءورت قاۋىپسىزدىگى ەرەجەلەرىن ساقتاۋدى ەسكە سالادى. ەگەر كولىك قوزعالىس كەزىندە جانعان بولسا، مىناداي ارەكەتتەردى ورىنداۋ كەرەك:
- كولىكتى دەرەۋ توقتاتىپ، جولاۋشىلاردى سالوننان ەۆاكۋاسيالاۋ؛
- 101 نومىرىنە قوڭىراۋ شالۋ، سونداي-اق جاقىن ماڭداعى ادامداردان كومەك سۇراڭىز؛
- قوزعالتقىشتى ءسوندىرىپ، كاپوتتى ىسىرمالاردان بوساتۋ، اككۋمۋلياتوردى دەرەۋ اجىراتۋ جانە ءورت سوندىرگىشتى قولدانۋ. تەز تۇتاناتىن سۇيىقتىقتار مەن ەلەكتر جابدىقتارىن سوندىرۋگە ارنالعان كەمىندە ءبىر ليتر ءورت سوندىرگىشتى وزىڭىزبەن بىرگە الىپ جۇرگەنىڭىز ءجون. ءورت سوندىرگىشتىڭ كولەمى نەعۇرلىم كوپ بولسا، ءورتتىڭ الدىن الۋ مۇمكىندىگى سوعۇرلىم جوعارى بولادى؛
- قوزعالتقىشتاعى ءورتتى ءوشىرۋ ءۇشىن سۋدى قولدانباڭىز، ول ەلەكتر سىمدارىنىڭ قىسقا تۇيىقتالۋىنا جانە جانارماي جانۋىنىڭ ورشۋىنە اكەلۋى مۇمكىن؛
- ەگەر ءورت سۇيىق وتىن كولىكتىڭ ارتقى جاعىنا تارالسا، دەرەۋ كولىكتەن الىس جەرگە جۇگىرىڭىز؛
- ەگەر اۆتوكولىك گاراجدا ورتەنىپ كەتسە، ونى سىرتقا شىعارىپ ءسوندىرىڭىز؛
- ەگەر ءسىز سول ساتتە مايمەن نەمەسە بەنزينمەن جۇمىس ىستەگەن بولساڭىز، ءورتتى سوندىرۋگە تىرىسپاڭىز. مۇنداي جاعدايدا ءوزىڭىز زارداپ شەگۋىڭىز مۇمكىن.