اۆتوجولداردى تازالاۋ جۇمىسى قارقىندى ءجۇرىپ جاتىر

ءبىر اپتادا كەي وڭىرلەردە جاۋىن-شاشىن مولشەرى ەكى ايلىق نورمادان اسىپ تۇسكەن.

1 قاڭتاردان باستاپ بۇگىنگە دەيىن اۋا رايىنىڭ كۇرت ناشارلاۋىنا بايلانىستى رەسپۋبليكالىق ماڭىزى بار اۆتوجولداردا قوزعالىس 126 رەت شەكتەلدى، دەپ حابارلايدى Almaty-akshamy.kz QazAvtoJol باسپا ءسوز قىزمەتىنە سىلتەمە جاساپ.

جول قىزمەتتەرى قۇبىلمالى اۋا رايى سالدارىمەن كۇرەسىپ، تاسجولداردى جاۋعان قاردان ۇزدىكسىز، كۇشەيتىلگەن رەجيمدە تازارتىپ جاتىر.

اباي جانە شىعىس قازاقستان وڭىرلەرىندە ءتورت تاۋلىك بويى كۇن رايى اشىلماي تۇر. وسىعان بايلانىستى بۇل وڭىرلەردەگى تاسجولداردا جاعداي ءالى دە كۇردەلى.

«قازگيدرومەت» رمك اقپاراتىنا سايكەس، بۇل وڭىرلەردە ءبىر اپتاعا جەتپەس ۋاقىت ىشىندە جاۋىن - شاشىن مولشەرى ەكى ايلىق نورمادان اسىپ تۇسكەن. ەگەر نورما مولشەرى 11-31 ميلليمەتر بولسا، بۇل وڭىرلەردە 77 ميلليمەترگە دەيىن جاۋىن-شاشىن جاۋعان. جولشىلار ەكى مەترگە جۋىق قاردى تازالاۋدا.

ءبىر جەتى ىشىندە اباي جانە شىعىس قازاقستان وڭىرلەرىندە قار قۇرساۋىنان ارنايى تەحنيكا كومەگىمەن 1 مىڭنان استام كولىك شىعارىلدى.

وسى ۋاقىت ارالىعىندا جولشى ماماندار رەسپۋبليكالىق ماڭىزداعى كۇرە جولدار جەلىسىنە 7 مىڭ تەكشە مەتر كوكتايعاققا قارسى ماتەريالداردى سەپتى.

1403 بايلانىس ورتالىعىنىڭ ماماندارى دا كۇشەيتىلگەن رەجيمدە قىزمەت اتقارۋدا. سوڭعى جەتى كۇندە وپەراتورلار جول پايدالانۋشىلارىنان كەلگەن 30 مىڭعا جۋىق قوڭىراۋدى وڭدەدى.

رەسپۋبليكالىق ماڭىزى بار اۆتوموبيل جولدارىن قاردان تازارتۋ جۇمىستارى جالعاسا بەرمەك. قىسقى كۇتىپ ۇستاۋ جۇمىستارىنا 600 بىرلىك ارنايى تەحنيكا جۇمىلدىرىلدى.