سەمەيلىكتەر كىتاپتى اۆتوبۋستا دا وقيدى. رۋحانياتتى ويلايتىن جەرگىلىكتى بەلسەندىلەر قوعامدىق كولىكتەردە تۇرعىنداردى كىتاپ وقۋعا شاقىراتىن «دانالىق ىزىمەن» دەگەن اكسيا باستاپتى.
قالا ىشىندە جۇرەتىن اۆتوبۋستاردىڭ سىرتىنا ۇلى ابايدىڭ «دۇنيە دە ءوزى، مال دا ءوزى، عىلىمعا كوڭىل بولسەڭىز»، «ءۇش-اق نارسە ادامنىڭ قاسيەتى: ىستىق قايرات، نۇرلى اقىل، جىلى جۇرەك» دەگەن سەكىلدى قاناتتى سوزدەرى جاپسىرىلعان. ال اۆتوبۋس ىشىنە شاعىن كىتاپ سورەسى قويىلىپ، وندا اقىن-جازۋشىلارىمىزدىڭ كىتاپتارى ورنالاستىرىلعان.
– كىتاپ وقۋ اۆتوبۋس، ءۇي دەپ قارامايدى. ءار ادامنىڭ زەيىنىنە، پەيىلىنە بايلانىستى. كىتاپتار جاقسى ەكەن. ماعىنالى، ۇعىنىقتى، – دەپ سۇحبات بەرىپتى «24 حابارعا» ەركىن ەكىبايەۆ دەگەن سەمەيلىك.
اۆتوبۋس ىشىندە كىشكەنتاي ءبىر ۇل بالا دا كىتاپ پاراقتاپ وتىر. انە، بىزگە كەرەگى سول عوي، كىتاپتى تۇگەل وقىپ تاستاماسا دا، ايتەۋىر، ءبىر جولى نەمەسە ابزاسى بالانىڭ كوز الدىندا، ساناسىندا قالارى ءسوزسىز.
«اۆتوبۋستاعى كىتاپ سورەسى» وڭىرلەرگە تاراتاتىن جاقسى يدەيا ەكەن، ءا؟! قالادا ازىرگە 6 اۆتوبۋس سولاي بەزەندىرىلىپ، 60-تان استام كىتاپ جينالىپتى. ەرەكشە اكسيانى ۇيىمداستىرۋشىلار الداعى ۋاقىتتا كىتابى بار اۆتوبۋستى دا، كىتاپتار سانىن دا كوبەيتكەلى وتىرعان كورىنەدى.
ازىرلەگەن نۇر جامال