دامىعان قوعامدىق كولىك قالا تۇرعىندارىنىڭ جايلى ءومىر ءسۇرۋىنىڭ، جولداعى كەپتەلىستەردى ازايتۋ مەن اۋا ساپاسىن جاقسارتۋ ينديكاتورلارىنىڭ ءبىرى بولىپ تابىلادى.
بۇل تۋرالى ءماسليحات سەسسياسىندا الماتىنىڭ قالاسىنىڭ 2023-2025 جىلدارعا ارنالعان بيۋدجەت جوباسىن قاراۋ بارىسىندا ەربولات دوسايەۆ مالىمدەدى، دەپ حابارلايدى Almaty-akshamy.kz
«ءبىز وسى جىلدىڭ قىركۇيەك ايىندا بەكىتكەن دامۋ باعدارلاماسىندا اۆتوبۋس پاركىن جاڭارتۋ مەن ونى ەكولوگيالاندىرۋدى ەسكەرە وتىرىپ، قوعامدىق كولىكتى دامىتۋعا باسىمدىق بەرىلەدى.
وسىعان بايلانىستى، 2023 جىلى ءبىز گازبەن جۇرەتىن 300 اۆتوبۋس ساتىپ الامىز. بيىل قاراشا ايىندا سىزدەر 200 اۆتوبۋسقا 14،2 ملرد. تەڭگە قاراجات ءبولۋدى قولدادىڭىزدار. سونداي-اق، تروللەيبۋس پاركىن جاڭارتۋ جالعاسادى – ءبىز 6،4 ملرد. تەڭگەگە 100 تروللەيبۋس ساتىپ الۋدى كوزدەپ وتىرمىز. وسى شارالاردىڭ ارقاسىندا ءبىز قىزمەتتەردىڭ ساپاسىن جاقسارتىپ، قوعامدىق كولىك قوزعالىسىنىڭ ينتەرۆالىن ازايتامىز»، - دەدى قالا اكىمى ە.دوسايەۆ.
2023 جىلعا قالالىق مارشرۋتتاردى سۋبسيديالاۋعا 55،9 ملرد. تەڭگە قاراستىرىلعان. وسى 30 مارشرۋتتاعى اۆتوبۋستاردى جاڭارتۋعا جانە قوسىمشا 400 بىرلىكپەن نىعايتۋعا مۇمكىندىك بەرەدى، بۇل قوعامدىق كولىك قىزمەتتەرىنىڭ ساپاسىن جاقسارتادى.
كەلەسى جىلى مەتروپوليتەن جەلىسىن باتىس باعىتقا قاراي سالۋ جالعاسادى (قالقامان ستانسياسىنىڭ 3ء-شى كەشەنىن ىسكە قوسۋ)، وعان 12،1 ملرد. تەڭگە كوزدەلەدى. بۇل 2024 جىلى قالانىڭ باتىس بولىگىندەگى 50 مىڭنان استام تۇرعىن ءۇشىن قوسىمشا كولىك بايلانىسىن قامتاماسىز ەتەدى.
سونداي-اق، تولە بي كوشەسىن ۇزارتىپ سالۋ جالعاسادى، ونىڭ جالپى سوماسى 11،7 ملرد. تەڭگە. جۇبانوۆ كوشەسىمەن ۇزارتىپ سالۋ مەملەكەتتىك ساراپتامادان وتۋدە.
بۇدان باسقا، 2 كولىك جولايرىعىن اياقتاۋ جوسپارلانعان (بۇقتىرما – قۇلجا كۇرە جولى، ساين – موڭكە بي كوشەلەرى)، ول ءۇشىن 6،2 ملرد. تەڭگە قاراستىرىلعان.
الاتاۋ (ف. وڭعارسىنوۆا مەن موڭكە بي كوشەلەرىنىڭ قيىلىسىندا) جانە مەدەۋ اۋداندارىندا (جەتىسۋ بازارىنا قاراما-قارسى قۇلجا كۇرە جولىندا) ورنالاسقان 2 كوممۋنالدىق اۆتوبۋس پاركىن (148 ملن. تەڭگە) جوبالاۋ اياقتالادى، ولاردىڭ ءارقايسىسىنىڭ قۇرىلىسى 8 ملرد. تەڭگەگە باعالانىپ وتىر.
كەلەسى جىلى جول ينفراقۇرىلىمىنا ەرەكشە نازار اۋدارىلعان. 200 كم جولعا ورتاشا جوندەۋ جۇرگىزىلەدى، 30 كم تروتۋارلار مەن 80 وستانوۆكا الاڭى سالىنادى. ول ءۇشىن 20،8 ملرد. تەڭگە قاراستىرىلعان. ناتيجەسىندە، كەلەسى جىلى جاقسى جانە قاناعاتتانارلىق جاعدايداعى جولداردىڭ ۇلەسى 89%-كە جەتەدى.
جالپى، ءبىزدىڭ مەگاپوليستە وزىق ستاندارتتارعا سايكەس كولىك ينفراقۇرىلىمى جەتكىلىكتى دامىماعان. قالا ءوسىپ كەلەدى، سوندىقتان ونىڭ كولىك كاركاسىن ۇنەمى جاقسارتىپ وتىرۋ قاجەت. بيۋدجەت جوباسىندا قالا اۋداندارىنىڭ اراسىنداعى بايلانىستى، سونداي-اق الماتى اگلومەراسياسىنىڭ دامۋىن ەسكەرە وتىرىپ، 2040 جىلعا دەيىن الماتى قالاسىنىڭ كولىك كاركاسىن دامىتۋدىڭ شەبەرلىك-جوسپارىن ازىرلەۋگە 370 ملن. تەڭگە كوزدەلگەن.