«Wallking tall» دەپ اتالاتىن جوبا ەم قابىلداۋشىنىڭ قيمىل-قوزعالىسىن ارتتىرىپ، ءجۇرىسىن شيراق ەتۋگە مۇمكىندىك بەرەدى.
الەمدە پاركينسونعا شالدىققان ادامداردىڭ سانى 10 ملن-عا جۋىقتايدى، دەپ حابارلايدى Almaty-akshamy.kz.
24.kz مالىمەتتەرىنە جۇگىنسەك، جەر ءجۇزىن جايلاعان دەرت ەگدە جاستاعىلاردى عانا ەمەس، جەتكىنشەكتەردى دە ءوزىنىڭ قۇربانى ەتە باستادى.
مارتين وستروۆسكيي 7 جىلدان بەرى پاركينسونمەن كۇرەسىپ كەلەدى. اسقىنعان اۋرۋ سالدارىنان سوڭعى ۋاقىتتا ءجۇرىپ-تۇرۋى باسەڭدەي تۇسكەن.
«ءار كۇن سايىن وزىمە قايتا ءجۇرىپ-تۇرۋدى ۇيرەتەمىن. ءدارى اعزاعا اسەر ەتكەندە عانا كوشەدە دەنى دۇرىس ادام رەتىندە كورىنۋىم مۇمكىن. وزگەلەر ايىرماشىلىقتى مۇلدەم بايقاماس تا ەدى. ال باسقا كەزدە جاعداي ءتىپتى بولەك، ارەڭ قوزعالامىن. باعدارلامانى قولدانعالى جاعدايىم ءسال جاقسارعان سىڭايلى»، - دەدى ەمدەلۋشى مارتين وستروۆكيي.
اۆستراليادا 200 مىڭنان استام ناۋقاستا پاركينسون تىركەلگەن. ال تاۋلىگىنە 38 ادامدا ءدال وسى دەرتكە دياگنوز قويىلادى. پاسيەنتتەردىڭ كۇن ساناپ ارتۋى اۆستراليالىق عالىمداردى بەي-جاي قالدىرمادى. وڭتۇستىك ۋەللس ۋنيۆەرسيتەتىنىڭ نيەۆرولوگى مەتيۋ برودي ناۋقاستاردىڭ ءجۇرۋ قابىلەتىن جاقسارتۋعا كومەكشى باعدارلاما ويلاپ تاپتى.
«باعدارلامانىڭ ەڭ نەگىزگى فۋنكسياسى – مەترونومنىڭ ءريتمىن قالىپتاستىرادى. مەترونوم قوزعالىس پەن ءجۇرىستى داۋىستاپ ايتىپ تۇراتىن قۇرال. ول نەيرونداردى بەلسەندى ەتىپ، ءجۇرۋ قابىلەتىن ارتتىرۋعا مۇمكىندىك بەرەدى»، - دەدى عالىم مەتيۋ برودي.
قوسىمشانى قولدانۋشىلار ءجۇرۋ ۋاقىتى مەن قارقىنىن بەلگىلەپ بارىپ، قوزعالىسقا كىرىسەدى. ولار وسى كۇنى اپتالىق جاتتىعۋدىڭ 150 مينۋتىن بەلسەندى ورىنداپ، جوبانىڭ يگىلىگىن سەزىنۋدە. جەتىسىنە ەكى شاقىرىم عانا سەرۋەندەيتىن وستروۆسكيي قوسىمشانى قولدانعالى 30 كيلومەتردى باعىندىرىپ ۇلگەرگەن.
قوسىمشا ينسۋلت، تىزە-جامباس جاراقاتىن العان ناۋقاستاردىڭ دا كادەسىنە جارايدى. تامىز ايىندا ىسكە قوسىلعالى بەرى 10 مىڭعا جۋىق پايدالانۋشى تىركەلىپ ۇلگەرگەن. ال قولدانۋ اقىسىز ءارى الەم بويىنشا قولجەتىمدى.