روزا باعلانوۆا اتىنداعى «قازاقكونسەرت» مەملەكەتتىك اكادەميالىق كونسەرتتىك ۇيىمىنىڭ قازاق مەملەكەتتىك سيمفونيالىق وركەسترى چەحيانىڭ ەڭ بەدەلدى ساحنالارىنىڭ ءبىرى – «رۋدولفينۋم» كونسەرت زالىندا ونەر كورسەتتى، دەپ حابارلايدى aqshamnews.kz.
الەمنىڭ بەلدى ساحنالارىنىڭ بىرىندە قازاقستاندىق جانە الەمدىك كلاسسيكالىق مۋزىكانىڭ جاۋھارلارى ورىندالدى.
كونسەرت حالىقارالىق ارەنادا ەلىمىزدىڭ مادەني ءيميدجىن نىعايتۋ جانە قازاقستان مەن چەحيا اراسىنداعى ديپلوماتيالىق بايلانىستاردى دامىتۋ ماقساتىندا ۇيىمداستىرىلدى. رۋحاني كەش – ەكى ەل اراسىنداعى مادەنيەتارالىق ىنتىماقتاستىققا دەگەن ۇمتىلىستىڭ ايقىن كورىنىسى.
ەلىمىزدىڭ جەتەكشى مۋزىكالىق ۇجىمدارىنىڭ بىرەگەيى – قازاق مەملەكەتتىك سيمفونيالىق وركەسترىنىڭ قۇرامى اسقان ۆيرتۋوز شەبەرلەر مەن كامەرالىق مۋزىكالاۋدىڭ ۇزدىك الەمدىك داستۇرلەرىن دامىتىپ جۇرگەن كاسىبي مۋزىكانتتاردان قۇرالعان.