اۋىز سۋ ساپاسى سىن كوتەرمەيدى

بىلتىرعى زەرتتەۋ بويىنشا، قۇبىرلارداعى اۋىز سۋدىڭ 3،9%-ى سانيتارلىق تالاپقا سايكەس كەلمەيدى.

بۇل تۋرالى يندۋستريا جانە ينفروقۇرىلىمدىق دامۋ مينيسترلىگى اشىق تالقىعا شىعارعان «2023-2029 جىلدارعا ارنالعان تۇرعىن ۇي-كوممۋنالدىق ينفراقۇرىلىمىن دامىتۋ تۇجىرىمداماسىندا» جازىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ. 

تۇجىرىمدامادا ەلدىڭ قازىرگى ينفراقۇرىلىمىنا تالداۋ جاسالىپ، ماسەلەلەر كورسەتىلگەن. سولاردىڭ ءبىرى – اۋىز سۋدىڭ ساپاسى.

«ءقاۋىپسىز سۋ قورى، گيگيەنا جانە سانيتاريا، سونداي-اق سۋ رەسۋرستارىن ءتيىمدى باسقارۋ بۇكىل الەمدەگى ادامداردىڭ دەنساۋلىعى ءۇشىن ماڭىزدى. سانيتاريالىق-ەپيدەميولوگيالىق باقىلاۋ سالاسىنداعى ۋاكىلەتتى ورگاننىڭ دەرەكتەرى بويىنشا بىلتىر سۋ قۇبىرى سۋىنىڭ 26 670 سىناماسى سانيتاريالىق-حيميالىق كورسەتكىشتەرگە زەرتتەلدى. ونىڭ ىشىندە 1 028 نەمەسە 3،9%-ىنىڭ تالاپقا سايكەس كەلمەيتىنى انىقتالدى. سونداي-اق، 2022 جىلى ميكروبيولوگيالىق كورسەتكىشتەرگە 28 764 سۋ سىناماسى زەرتتەلدى. ونىڭ ىشىندە 646 نەمەسە 2،4%-ى نورمالارعا سايكەس كەلمەيدى»، - دەلىنگەن تۇجىرىمدامادا.

يندۋستريا مينيسترلىگىنىڭ دەرەگىنشە، ەلىمىزدە سۋدى جيناۋ، وڭدەۋ قىزمەتتەرىن كورسەتەتىن 558 كاسىپورىن بار. ولاردىڭ ىشىندە 155ء-ى (27،8 %) مەملەكەتتىك كوممۋنالدىق مەنشىكتە بولسا، 403ء-ى (72،2%) – جەكە.

ۆەدومستۆو بۇل ماسەلەلەردىڭ شەشىمى رەتىندە «2023-2029 جىلدارعا ارنالعان تۇرعىن ۇي-كوممۋنالدىق ينفراقۇرىلىمىن دامىتۋ تۇجىرىمداماسىن» بەكىتۋدى ۇسىنادى. وندا قالالار مەن ەلدى مەكەندەردى اۋىز سۋمەن قامتاماسىز ەتۋ، ونىڭ ساپاسىن جاقسارتۋ بويىنشا كەشەندى شارالار قاراستىرىلعان.

قۇجات 15 ناۋرىزعا دەيىن كوپشىلىك تالقىلاۋدا بولادى.