مەديسينالىق ساقتاندىرۋ قورى جىل سايىن پروفيلاكتيكالىق تەكسەرۋلەرگە قاراجات ءبولىپ وتىرادى. ونىڭ ىشىندە، الەۋمەتتىك ماڭىزى بار اۋرۋلاردى انىقتاۋعا ارنالعان سكرينينگتەر دە بار. سكرينينگتىك زەرتتەۋلەردىڭ ماڭىزى نەدە؟ تەكسەرۋدەن نەگە ۋاقتىلى ءوتۋ قاجەت؟ تاقىرىپقا قاتىستى وسى جانە وزگە دە ماڭىزدى سۇراقتارعا مسق الماتى فيليالى ساراپشىلارى جاۋاپ بەرەدى.
مامانداردىڭ ايتۋىنشا، اۋرۋدىڭ كوبىنىڭ جازىلۋى قانشالىقتى ەرتە انىقتالعانىنا تىكەلەي بايلانىستى. ۋاقتىلى انىقتالعان دەرتتى ەمدەۋ دە وڭاي. سوندىقتان بۇگىنگى تاڭدا ەلىمىزدە اۋرۋدى ەرتە انىقتاۋ مۇمكىندىگى ارتىپ وتىرعانى قۋانتپاي قويمايدى.
ماسەلەن، 2022 جىلى الماتى قالاسى بويىنشا ءسۇت بەزى وبىرى سكرينينگىنە 431،9 ملن تەڭگە بولىنگەن، تاعى 297،1 ملن تەڭگە جاتىر موينى وبىرىن انىقتايتىن زەرتتەۋلەرگە ارنالعان. ال، كولورەكتالدى وبىر سكرينينگىنە 96،7 ملن تەڭگە جۇمسالماق.
سكرينينگ دەگەنىمىز نە جانە ونىڭ قاجەتى قانشا؟
سكرينينگ – اۋرۋدى جانە ونىڭ تۋىنداۋىنا اسەر ەتەتىن فاكتورلاردى ەرتە انىقتاۋعا مۇمكىندىك بەرەتىن مەديسينالىق زەرتتەۋلەر جيىنتىعى. تەكسەرۋدىڭ بۇل تۇرىنە سالالىق مامانداردىڭ كونسۋلتاسياسى مەن زەرتحانالىق-دياگنوستيكالىق زەرتتەۋلەر كىرەدى.
سكرينينگ ارقىلى قانداي سىرقاتتاردى انىقتاۋعا بولادى؟
- زياندى ادەتتەردەن تۋىندايتىن ءقاۋىپ فاكتورلارىن ەرتە انىقتاۋ – 30-70 جاس ارالىعىنداعى ەرلەر مەن ايەلدەر
- ارتەريالدى گيپەرتونيا، جۇرەكتىڭ يشەميالىق اۋرۋى مەن قانت ديابەتىن ەرتە انىقتاۋ – اتالعان دياگنوز نەگىزىندە ديناميكالىق باقىلاۋعا الىنباعان 40-70 جاس ارالىعىنداعى ەرلەر مەن ايەلدەر
- گلاۋكوماعا تەكسەرۋ (كوز ءىشى قىسىمىن) – 40-70 جاس ارالىعىنداعى ەرلەر مەن ايەلدەر
- جاتىر موينى وبىرىن ەرتە انىقتاۋ – 30-70 جاس ارالىعىنداعى ايەلدەر
- ءسۇت بەزى وبىرىن ەرتە انىقتاۋ – 40-70 جاس ارالىعىنداعى ايەلدەر
- كولورەكتالدى وبىردى ەرتە انىقتاۋ – 50-70 جاس ارالىعىنداعى ەرلەر مەن ايەلدەر
- ۆ مەن س ۆيرۋستى گەپاتيتتەرىن ەرتە انىقتاۋ
سونىمەن قاتار، پروفيلاكتيكالىق تەكسەرۋلەردەن 18 جاسقا دەيىنگى بالالار دا وتە الادى. وعان بالانىڭ پسيحوفيزيكالىق جانە جىنىستىق دامۋ دەڭگەيىن باعالاۋ، زورلىق-زومبىلىق بەلگىلەرى بار-جوعىن انىقتاۋعا ارنالعان تەكسەرۋلەر كىرەدى. بەلگىلى ءبىر اقاۋ تابىلعان جاعدايدا سالالىق مامانعا جولداما بەرىلەدى.
پروفيلاكتيكالىق تەكسەردەن وتۋگە جولدامانى كىم بەرەدى؟
سكرينينگتەن ءوتۋ ءۇشىن تىركەلگەن ەمحاناداعى ۋچاسكەلىك دارىگەردەن (تەراپيەۆت) جولداما الۋ قاجەت. جاس مولشەرىنە قاراي بەكىتىلگەن سكرينينگتەردەن بىردەن وتۋگە بولادى.
پروفيلاكتيكالىق تەكسەرۋلەر ءمامس پاكەتىنە ەنگەن، سوندىقتان سكرينينگتەن وتەتىن ازامات ساقتاندىرىلعان بولۋى شارت.
سكرينينگتەن ءوتۋ جيىلىگى قانداي؟
سكرينينگتىك زەرتتەۋلەردىڭ كەي ءتۇرى بەس جىل سايىن، كەيبىرى ەكى نەمەسە ءتورت جىل سايىن جاسالادى. بۇل مەرزىم ءار اۋرۋدىڭ دامۋ قارقىنىنا قاراي بەلگىلەنگەن.
سكرينينگ ناتيجەسىن قالاي بىلۋگە بولادى؟
سكرينينگتىك زەرتتەۋدەن وتكەن پاسيەنتتەر دەنساۋلىعىنان اقاۋ تابىلعان جاعدايدا، سالالىق مامانداردىڭ كونسۋلتاسياسىنا جىبەرىلەدى، قاجەت بولعاندا، ەم تاعايىندالادى.