ادام ءومىرى — ەلىمىزدىڭ باستى قۇندىلىعى، سوندىقتان مەن بۇل قادامعا ويلانباستان باردىم
اقتوبە وبلىسىندا اۋىلىنىڭ تۇرعىنىن ولىمنەن قۇتقارىپ قالعان وكرۋگ اكىمى ماراپاتتالدى، دەپ حابارلايدى Almaty-akshamy.kz Baq.kz-كە سىلتەمە جاساپ.
رۋسلان بايساعىزوۆ — اقتوبە وبلىسى مارتوك اۋدانى قاراتوعاي اۋىلدىق وكرۋگىنىڭ اكىمى. ول 1 ماۋسىم كۇنى اۋىلىنداعى 50 مەترلىك مۇناراعا شىعىپ، وزىنە قول جۇمساماق بولعان تۇرعىندى ولىمنەن اراشالاپ قالعان.
نەگىزى وقيعا بىلاي بولعان: اۋىل تۇرعىنى وز-وزىنە قول جۇمساماق بولىپ، اۋىلىنداعى بيىك مۇناراعا شىعادى. ونى كورگەن الگى ازاماتتىڭ تۋىستارى مەن اۋىل تۇرعىندارى ۋ-شۋ بولىپ، سابىرعا شىعارادى. ءبىراق ولىمگە «اسىققان» الگى كىسى ولاردىڭ سوزىنە كونبەيدى، ءتىپتى، توتەنشە قىزمەتتىڭ قىزمەتكەرلەرى دە كومەكتەسە المايدى. سول ساتتە وكرۋگ اكىمى وقيعا ورنىنا بارىپ، اۋىل تۇرعىنىمەن ەكى ساعات بويى كەلىسسوز جۇرگىزىپ، اقىرى ونى ولىمنەن قۇتقارىپ قالادى.
اۋىلىنىڭ تۇرعىنىن قۇتقارىپ قالعان وكرۋگ اكىمىن ق ر مەملەكەتتىك قىزمەت ىستەرى اگەنتتىگىنىڭ اقتوبە وبلىسى بويىنشا دەپارتامەنتىنىڭ باسشىسى ادىلبەك مۇقاشيەۆ ماراپاتتاپ، وعان ق ر مەملەكەتتىك قىزمەت ىستەرى اگەنتتىگى ءتوراعاسى دارحان جازىقبايەۆتىڭ ارنايى العىس حاتىن تابىستادى.
«رۋسلاننىڭ بۇل «ەرلىگىن» ءقازىر بارشا مارتوكتىكتەر ايتىپ ءجۇر. ءبىز دە وسىنداي مەملەكەتتىك قىزمەتشىلەرىمىزدىڭ بارىن ماقتان ەتەمىز. رۋسلانعا قىزمەتىندە ساتتىلىك تىلەيمىز»، — دەيدى دەپارتامەنت باسشىسى.
ال وكرۋگ اكىمىنىڭ ايتۋىنشا، وزىنە قول جۇمساماق بولعان كىسى باسقا بىرەۋدەن قاراجاتىن الا الماي جۇرگەن. سول سەبەپتى وزىنە نازار اۋدارتپاقشى بولىپتى.
«وقيعا ورنىنا شۇعىل تۇردە جەتتىم. الايدا كەلىسسوز ۇزاق ۋاقىتقا سوزىلدى. ناتيجەسىندە وزىنە قول جۇمساماق بولعان تۇرعىنعا مورالدىق قولداۋ كورسەتىپ، قۇزىرلى ماماندارمەن بىرلەسىپ تومەنگە ءتۇسىرىپ الدىق. ادام ءومىرى — ەلىمىزدىڭ باستى قۇندىلىعى، سوندىقتان مەن بۇل قادامعا ويلانباستان باردىم. ءارى مەملەكەتتىك قىزمەتشى رەتىندە اۋىلىمنىڭ ادامدارىنا قولداۋ كورسەتۋ، كومەك بەرۋ — مەنىڭ پارىزىم»، — دەيدى رۋسلان.