قازاقستان رەسپۋبليكاسى دەنساۋلىق ساقتاۋ مينيسترلىگى مەملەكەت باسشىسىنىڭ تاپسىرماسى اياسىندا اۋىلدىق جەرلەردە مەديسينالىق كومەكتىڭ ساپاسى مەن قولجەتىمدىلىگىن جاقسارتۋ بويىنشا اۋقىمدى شارالاردى ىسكە اسىرۋدا، دەپ حابارلايدى aqshamnews.kz
كولىك مەديسيناسى – تۇرعىندارعا مەديسينالىق كومەكتىڭ قولجەتىمدىلىگىن ارتتىرۋدىڭ قارقىندى دامىپ كەلە جاتقان باعىتى. ەلىمىزدىڭ شالعاي اۋداندارىنىڭ تۇرعىندارىنا مەديسينالىق قىزمەتتەردىڭ قولجەتىمدىلىگىن ارتتىرۋ ءۇشىن جىلجىمالى مەديسينالىق كەشەندەر (جمك) بەلسەندى تۇردە جۇمىس ىستەپ كەلەدى.
2024 جىلى 3072 ەلدى مەكەننىڭ 1،2 ملن تۇرعىنى «دوڭگەلەكتەگى ەمحانالاردىڭ» كومەگىمەن دارىگەرلەردىڭ كەڭەستەرى مەن دياگنوستيكالىق ەم-شارالاردى الدى. بۇل كەشەندەر ارقىلى بەيىندى ماماندار 1،2 ملن كونسۋلتاسيا، 656 مىڭ دياگنوستيكالىق، 333 مىڭ زەرتحانالىق زەرتتەۋ جۇرگىزدى.
قاراپ-تەكسەرۋ بارىسىندا ءارتۇرلى اۋرۋلارى بار 95 مىڭ پاسيەنت انىقتالدى، ولاردىڭ 78،3%-ى ەرەسەكتەر، ال 21،7%-ى بالالار. كاسىپتىك تەكسەرۋ ناتيجەسىندە 33،7 مىڭ اۋىل تۇرعىنى ديسپانسەرلىك باقىلاۋعا الىندى.
"سالاماتتى قازاقستان" مەديسينالىق پويىزى 2024 جىلى 128 ستانسيانىڭ 104 مىڭ تۇرعىنىنا، ونىڭ ىشىندە 21 مىڭ بالاعا مەديسينالىق قىزمەت كورسەتتى. بۇل وتكەن جىلمەن سالىستىرعاندا 20%-عا ارتىق. پويىز ماماندارى 240 مىڭ مەديسينالىق قىزمەت، سونىڭ ىشىندە 12،5 مىڭ ستوماتولوگيالىق ەم-شارا، 25 مىڭ زەرتحانالىق زەرتتەۋ، 8 مىڭ شاعىن حيرۋرگيالىق وپەراسيا جانە 24 مىڭ اسپاپتىق زەرتتەۋ جۇرگىزدى.
اۋىلدىق دەنساۋلىق ساقتاۋدى جاڭعىرتۋ ۇلتتىق جوباسى اياسىندا اۋىلدىق اۋدانداردا مەديسينالىق ينفراقۇرىلىمدى جۇيەلى جاڭارتۋ جالعاسۋدا. 2024 جىلى 460 نىساننىڭ قۇرىلىسى اياقتالدى، تاعى 195 نىساننىڭ قۇرىلىسى 2025 جىلى اياقتالادى.
جاڭا دارىگەرلىك امبۋلاتوريالار مەن فەلدشەرلىك-اكۋشەرلىك پۋنكتتەردە:
- كۇندىزگى ستاسيونارلار؛
- امبۋلاتوريالىق وڭالتۋ ءۇشىن فيزيوتەراپيا كابينەتتەرى؛
- زەرتحانالىق تەكسەرۋ كابينەتتەرى ىسكە قوسىلدى.
تەلەمەديسينالىق كابينەتتەردە اۋىل تۇرعىندارى وبلىستىق جانە رەسپۋبليكالىق كلينيكالاردىڭ جەتەكشى دارىگەرلەرىنەن قاشىقتان كونسۋلتاسيا الۋ مۇمكىندىگىنە يە بولدى.
2025 جىلى 32 اۋداندىق اۋرۋحانانى جاڭعىرتۋ جوسپارلانىپ وتىر. ولاردىڭ بازاسىندا:
- كارديولوگيالىق ورتالىقتار؛
- تراۆماتولوگيا، رەانيماسيا جانە حيرۋرگيا بولىمشەلەرى اشىلادى.
بۇل شارالار ينفاركت، ينسۋلت جانە جاراقات جاعدايلارىندا «التىن ساعات» قاعيداتىن ساقتاپ، ءولىم كورسەتكىشىن 20%-عا تومەندەتۋگە مۇمكىندىك بەرەدى.
مەديسينالىق كادرلاردى تارتۋ بويىنشا جاڭالىقتار:
اۋىلدىق جەرلەردە جۇمىسقا ورنالاسقان جاس دارىگەرلەرگە قوسىمشا قارجىلىق ىنتالاندىرۋ، تۇرعىن ۇيگە جەڭىلدىكتى كرەديتتەر جانە كاسىبي ءوسۋ مۇمكىندىكتەرى بەرىلەدى.
2024 جىلى وڭىرلەرگە 4148 تۇلەك جىبەرىلدى، ونىڭ ىشىندە 1233 دارىگەر اۋىلدىق جەرلەرگە جۇمىسقا ورنالاستى.
مەديسيناداعى جاڭا جوبالار:
- "ءبىر كۇندىك كلينيكالار" جوباسى جۇكتى ايەلدەردى پرەناتالدىق دياگنوستيكالاۋدىڭ جاڭا ادىستەرىمەن قامتيدى.
- "فەتالدىق مەديسينا" جوباسى اياسىندا 20 جاتىرىشىلىك وپەراسيا ءساتتى جۇرگىزىلدى.
بۇل جوبالار اۋىل تۇرعىندارىنا جوعارى تەحنولوگيالىق مەديسينالىق كومەكتىڭ قولجەتىمدىلىگىن قامتاماسىز ەتىپ، دەنساۋلىق ساقتاۋ سالاسىندا قالا مەن اۋىل اراسىنداعى تەڭ جاعداي جاساۋعا ىقپال ەتەدى.
