اۋىلدا كادرلاردى بەكىتۋ - ماڭىزدى ماسەلە.
بيىل اۋىلدىق ەلدى مەكەندەرگە مەديسينالىق ءبىلىمى بار 797 تۇلەك جىبەرىلدى. بۇل تۋرالى دەنساۋلىق ساقتاۋ ءمينيسترى اجار عينيات ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«دەنساۋلىق ساقتاۋ سالاسىن رەفورمالاۋ جىلدارىندا اۋىلداردا اۋرۋحانالار جابىلىپ، كەرەۋەتتەر قىسقاردى. سوعان بايلانىستى اۋىلداردا مەديسينا ماماندارىنىڭ سانى ازايا باستادى. بۇگىندە اۋىلدا كادر تاپشىلىعى ساقتالۋدا. وسى جىلدىڭ باسىندا ول شامامەن 1 مىڭ ماماندى قۇرادى. سونىمەن قاتار اۋىلدىق جەرلەردە پروفيلاكتيكا، اۋرۋدىڭ الدىن الۋ، ديناميكالىق باقىلاۋ ساپاسى تومەن، سوزىلمالى اۋرۋلارى بار پاسيەنتتەرگە كونسۋلتاسيالىق-دياگنوستيكالىق قىزمەتتەر، دارى-دارمەك قولجەتىمدىلىگى از»، - دەدى مينيستر ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.
ونىڭ اتاپ وتۋىنشە، بۇل حالىق دەنساۋلىعىنىڭ كەيبىر كورسەتكىشتەرىنە تەرىس اسەر ەتەدى. وسى پروبلەمانى ەسكەرە وتىرىپ، اۋىلدىق مەديسينا بويىنشا وڭىرلىك اكىمدىكتەرمەن جۇمىس جۇرگىزىلىپ جاتىر.
«اۋىلعا مەديسينا كادرلارىن تارتۋ ماسەلەلەرى بويىنشا مەملەكەتتىك ءبىلىم بەرۋ تاپسىرىسى ەسەبىنەن مەديسينالىق ماماندىقتاردا ءبىلىم العان جاستار ءۇش جىل مىندەتتى جۇمىس مەرزىمىن وتەيدى. بۇل نورما «ءبىلىم تۋرالى» زاڭعا 2012 جىلى ەنگىزىلگەن. اۋىلدا جۇمىسقا ورنالاسقان مەديسينا قىزمەتكەرلەرىن قولداۋ ماقساتىندا رەسپۋبليكالىق بيۋدجەتتەن 100 ايلىق ەسەپتىك كورسەتكىش مولشەرىندە كوتەرمە جاردەماقى جانە 1 500 ايلىق ەسەپتىك كورسەتكىش مولشەرىندە باسپانالى بولۋعا جاردەماقى كوزدەلگەن. سونىمەن قاتار، جەرگىلىكتى بيۋدجەتتەن ەلدى مەكەندەردەگى مامانداردى ىنتالاندىرۋ ماقساتىندا ءار دارىگەرگە 1-2 ميلليون تەڭگە كولەمىندە قاراجات بولىنەدى. اتاپ ايتقاندا، قوستاناي وبلىسى اكىمدىگىمەن 5 ميلليون، سولتۇستىك قازاقستان وبلىسى اكىمدىگىمەن 3 ميلليون تەڭگەگە دەيىن كوتەرمە تولەمدەر تولەنەدى. ناتيجەسىندە 2020-2021 جىلدارى اۋىلدىق دەنساۋلىق ساقتاۋ ۇيىمدارىنا 1 322 تۇلەك جۇمىسقا ورنالاستى. ول جۇمىسقا تارتىلعانداردىڭ 94 پايىزىن قۇرايدى. بۇل مينيسترلىكتىڭ اكىمدىكتەرمەن بىرلەسكەن جۇمىسىنىڭ كورسەتكىشى سانالادى. بيىل اۋىلدىق ەلدى مەكەندەرگە مەديسينالىق ءبىلىمى بار 797 تۇلەك جولداندى. بۇل جەردە اۋىلدا كادرلاردى بەكىتۋ ماڭىزدى ماسەلە. سوندىقتان مەديسينالىق كادر تاپشىلىعىن تومەندەتۋ ماقساتىندا جەرگىلىكتى اكىمدىكتەر كادرلاردى تارتۋ جانە الەۋمەتتىك قولداۋ جۇمىستارىن كۇشەيتىپ، جالعاستىرۋ قاجەت»، - دەدى اجار عينيات.