ەلىمىزدە سوڭعى 1،5 جىل ىشىندە 968 اۋىلدىق ەلدى مەكەندە بايلانىس ساپاسىنا تەكسەرۋ جۇرگىزىلدى. اتالعان اۋىلدار بارلىق ءموبيلدى وپەراتور جەلىسىنە قوسىلۋ بويىنشا «250+» باعدارلاماسىنا كىرەدى. بۇل تۋرالى ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى تەلەكوممۋنيكاسيالار كوميتەتىنىڭ ءتوراعاسى ەرجان مەيراموۆ ءمالىم ەتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
تەلەكوممۋنيكاسيالار كوميتەتى باسشىسىنىڭ مالىمەتىنشە، 3G جەلىسى ءۇشىن ەڭ تومەنگى ساپا پارامەترى سەكۋندىنا 1 مەگابيت، 4G ءۇشىن ءىرى قولدانۋشىعا سەكۋندىنا 5 مەگابيت قاجەت. تەكسەرۋدىڭ قورىتىندىسى بويىنشا اۋىلداردىڭ تەك 56-60 پايىزىندا عانا بايلانىس اتالعان تالاپتارعا سايكەس كەلەتىنى انىقتالدى.
«بايلانىس بازالارى ورناتىلعان كەزدە قولدانۋشىلار تۇتىناتىن اقپارات كولەمى ءۇشىن ساپا جەتكىلىكتى بولدى. جىل سايىن بايلانىستى تۇتىنۋ كولەمى مەن ترافيك ارتىپ كەلەدى. ول ساتتە باسقا قولدانۋشى ءۇشىن بايلانىس ساپاسى تومەندەيدى. بۇل مينيسترلىكتىڭ نەمەسە وپەراتوردىڭ ساپاسىز جۇمىس ىستەۋىنەن ەمەس. ۋاقىت وزگەرەدى، سايكەسىنشە تۇتىنۋ كولەمى ارتادى. بايلانىس ساپاسىن باسقا جابدىقتار ەسەبىنەن جاقسارتۋ نەمەسە بازالىق ستانسالاردىڭ تىعىزدىعىن قامتاماسىز ەتۋ قاجەت»، - دەپ تولىقتىردى ۆيسە-مينيستر.
بۇعان دەيىن ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين جارىق باعانالارىنا بايلانىسپەن قامتيتىن بازالىق ستانسالاردى دا ورناتۋ يدەياسىن ۇسىنعان بولاتىن. ودان بولەك، ۆەدومستۆو باسشىسى تۇرعىنداردىڭ راديوفوبياسى بايلانىس ساپاسىن ارتتىرۋعا كەدەرگى كەلتىرىپ وتىرعانىن تىلگە تيەك ەتتى.