اۋىلدان ءبىزدىڭ نەگە كەتەدى...

قازاقستان رەسپۋبليكاسىنىڭ پرەمەر-مينيسترى ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا اۋىلدىق اۋماقتاردى دامىتۋ ماسەلەسى قارالدى.

پرەمەر-مينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ اۋىلدىق جەرلەردى دامىتۋدىڭ اعىمداعى جاي-كۇيى تۋرالى باياندادى. ۆيسە-پرەمەردىڭ ايتۋىنشا، بۇگىندە ەلىمىزدە 6 256 اۋىلدىق ەلدى مەكەن بار، ولاردا 7،6 ملن ازامات نەمەسە رەسپۋبليكاداعى حالىق سانىنىڭ 38،4%-ى تۇرادى، دەپ حابارلايدى almaty-akshamy.kz

2019-2023 جىلدارى «اۋىل – ەل بەسىگى» جوباسى اياسىندا 1،8 مىڭ اۋىلدىق ەلدى مەكەندە 524 ملرد تەڭگە سوماسىنا 5،4 مىڭ جوبا ىسكە اسىرىلدى. سونداي-اق 85 مەديسينالىق-سانيتاريالىق العاشقى كومەك نىسانى سالىندى، 10،5 ملرد تەڭگەگە 1،8 مىڭ مەديسينالىق تەحنيكا ساتىپ الىندى، 120 ءورت ءسوندىرۋ بەكەتى قۇرىلدى. ينتەرنەتكە Wi-Fi HotSpot تەحنولوگياسى بويىنشا 176 اۋىل قوسىلعان.

مامانداردى تارتۋ ءۇشىن «ديپلوممەن اۋىلعا» جوباسى اياسىندا بيۋدجەتتىك نەسيە مولشەرى 1،5 مىڭنان 2،5 مىڭ اەك-كە دەيىن ۇلعايتىلدى.

وڭىرلەردەگى اۋىلدىق جەرلەردى دامىتۋ تۋرالى تۇركىستان وبلىسىنىڭ اكىمى دارحان ساتىبالدى، الماتى وبلىسىنىڭ اكىمى مارات سۇلتانعازين، اباي وبلىسىنىڭ اكىمى نۇرلان ۇرانحايەۆ بايانداما جاسادى.

ۇكىمەت باسشىسى ءار اۋىل تۇرعىنى تۇرمىستىق احۋالدىڭ جاقسارعانىن قالايتىنىن ايتتى. پرەمەر-مينيستر وڭىرلىك ستاندارتتار جۇيەسىنە سايكەس، اكىمدىكتەرگە اۋىل تۇرعىندارىنىڭ تۇرمىس ساپاسىن جاقسارتۋ بويىنشا مىندەتتەر قويدى. وبەكتىلەر مەن قىزمەتتەردىڭ ناقتى تىزبەسى وسى جۇيەدە قامتىلعان. تىزبەدە جازىلعان يگىلىكتەردىڭ بارلىعى ءاربىر ەلدى مەكەندە بولۋعا ءتيىس.

«ول ءۇشىن ءبىز قالا مەن اۋىلدىڭ تۇرمىس دەڭگەيىندەگى الشاقتىقتى بىرتىندەپ قىسقارتىپ كەلەمىز. مۇنداعى نەگىزگى فاكتور – قولجەتىمدى قىزمەتتەر، ياعني ساپالى جول، مەديسينا مەن ءبىلىم بەرۋ سياقتى اۋىل حالقىنىڭ جايلى تۇرمىسىنا قاجەتتى يگىلىكتەردىڭ بولۋى. مەكتەپتەر مەن مەديسينالىق مەكەمەلەر – اۋىلداعى ەڭ ماڭىزدى وبەكتىلەر. ولارعا ايرىقشا نازار قاجەت»، — دەدى ولجاس بەكتەنوۆ. 

وعان قوسا پرەمەر-مينيستر ستاندارتتار جۇيەسىن باسقا باعدارلامالىق قۇجاتتارمەن، سونىڭ ىشىندە ۇلتتىق جوبالارمەن ءوزارا ۇيلەستىرۋدى تاپسىردى.

مەكتەپتەردىڭ اپاتتى جاعدايدا بولۋىنان، دەنساۋلىق ساقتاۋ مەكەمەلەرىنىڭ جارامسىزدىعىنان كەيبىر اۋىلدار تۇرعىندارى مەديسينالىق قىزمەت جانە ءبىلىم الۋ ءۇشىن باسقا ەلدى مەكەندەرگە بارۋعا ءماجبۇر بولىپ وتىر.

«اۋىلداردا اۋىز سۋ مەن جولداردىڭ ساپاسىنا، ەلەكتر قۋاتى مەن ۇيالى بايلانىستىڭ جاعدايىنا جانە ينتەرنەتتىڭ قولجەتىمدى بولۋىنا قاتىستى مىڭداعان شاعىم كەلىپ تۇسەدى. مۇنىڭ بارلىعى اۋىل تۇرعىندارىنىڭ جاپپاي كوشىپ كەتۋىنە سەبەپشى بولادى. سوندىقتان الەۋمەتتىك، ينجەنەرلىك جانە كولىك ينفراقۇرىلىمىن، اسىرەسە شەكارا ماڭىنداعى اۋماقتاردىڭ ينفراقۇرىلىمىن دامىتۋ جۇمىستارىن كۇشەيتۋ كەرەك»، — دەدى ولجاس بەكتەنوۆ. 

وسى مىندەتتەردى كەزەڭ-كەزەڭمەن شەشۋ ءۇشىن ۇكىمنت سالىقتاردىڭ جانە بيۋدجەتكە تۇسەتىن تولەمدەردىڭ كەيبىر تۇرلەرىن اۋىلدىق وكرۋگتەردىڭ بيۋدجەتىنە بەرۋدى جالعاستىرادى.

سونىمەن قاتار ولجاس بەكتەنوۆ ماڭىزدى ينفراقۇرىلىمدىق جوبالاردى ىسكە اسىرۋعا بيزنەس سۋبەكتىلەرىن تارتۋدىڭ ماڭىزدىلىعىن اتاپ ءوتتى. ءبىرقاتار وڭىردە جاقسى مىسالدار بار. ماسەلەن، بىلتىر تۇركىستان وبلىسىنىڭ شۇبارسۋ اۋىلىنان شىققان كاسىپكەر سول ەلدى مەكەنگە ۇلكەن مەكتەپ سالىپ بەردى. اقمولا وبلىسىنىڭ قاراوتكەل اۋىلىندا جەكە قاراجاتقا بالاباقشا سالىندى.

«كاسىپكەرلەر تۇرعىن ءۇي قۇرىلىسىنا، جولداردى جوندەۋگە، كوشەلەردى اباتتاندىرۋعا، قوعامدىق دەمالىس ورىندارىن سالۋعا قولداۋ كورسەتۋدە. ەلىمىزدە مۇنداي جاقسى مىسالدار جەتكىلىكتى. اكىمدىكتەر اۋىل تۇرمىسىن جاقسارتۋ ىسىنە بيزنەستى دە بەلسەندى جۇمىلدىرۋعا ءتيىس»، — دەدى پرەمەر-مينيستر. 

ۇكىمەت باسشىسى اۋىلدارداعى كادر ماسەلەسىنە ەرەكشە نازار اۋداردى. اكىمدىكتەر اۋىلدىق جەرلەردە كادر تاپشىلىعى ماسەلەسىن شەشۋى قاجەت. كەلگەن ماماندارعا، اسىرەسە جاستارعا، سونىڭ ىشىندە «ديپلوممەن اۋىلعا» جوباسى اياسىندا كورسەتۋ كەرەك. 

ماسەلەنى قاراۋ قورىتىندىسى بويىنشا ولجاس بەكتەنوۆ اۋىلدىق اۋماقتاردى دامىتۋ تۇجىرىمداماسىنىڭ ءىس-شارالارىن ىسكە اسىرۋ بويىنشا ءبىرقاتار ناقتى تاپسىرما بەردى:

• 
  

  جوبالاردىڭ باسىمدىعىن جانە اۋىل تۇرعىندارىنىڭ بارلىعىنا بىردەي يگىلىكتەر مەن قىزمەتتەردىڭ قولجەتىمدى بولۋىن نازاردا ۇستاي وتىرىپ، اۋىلدىق ەلدى مەكەندەردىڭ ينفراقۇرىلىمىن دامىتۋ؛

  
  

• 
  

  اۋىلداعى تىنىس-تىرشىلىكتى قامتاماسىز ەتۋ ماسەلەلەرىن شەشۋدىڭ تيىمدىلىگىن ارتتىرۋ ءۇشىن اۋىلدىق وكرۋگتەر اكىمدىكتەرىنىڭ كىرىس بازاسىن كەڭەيتۋ ماسەلەسىن پىسىقتاۋ؛

  
  


• 
  

  اۋىلدا ينفراقۇرىلىمدىق جوبالاردى ىسكە اسىرۋعا بيۋدجەتتەن تىس قاراجات تارتۋ بويىنشا اكىمدىكتەردىڭ جۇمىسىن باعالاۋ ءۇشىن ناقتى ينديكاتورلاردى ايقىنداۋ كەرەك.