بولىنگەن قارجى اۋىلدىقتارعا جەتە ما؟
«اۋىلدا دەنساۋلىق ساقتاۋدى جاڭعىرتۋعا» 8،5 ترلن تەڭگە جۇمسالماق. بۇل تۋرالى پرەمەر-مينيستردىڭ ورىنباسارى-قارجى ءمينيسترى ەرۇلان جاماۋبايەۆ سەناتتىڭ جالپى وتىرىسىندا مالىمدەدى، -دەپ حابارلايدى اlmaty-akshamy.kz BAQ.KZ-كە سىلتەمە جاساپ.
مينيستر بيىلعى قازىنا قاراجاتىنا توقتالدى.
ءبىرقاتار ماڭىزدى مىندەتتەمەنى ىسكە اسىرۋعا 186 ملرد تەڭگە باعىتتالاتىن بولادى. بيۋدجەتتى قايتا قاراۋ ناتيجەسىندە ەكونوميكانىڭ ناقتى سەكتورى مەن وڭىرلەردى قولداۋعا ەرەكشە ءمان بەرىلدى. بۇنى شىعىس قۇرىلىمىنىڭ وزگەرۋىنەن بايقاۋعا بولادى. اتاپ ايتساق، ەكونوميكانىڭ ناقتى سەكتورىن قولداۋعا قوسىمشا 1،3 ترلن تەڭگە كوزدەلگەن. تيىسىنشە، شىعىستىڭ جالپى كولەمىندەگى بۇل باعىتتىڭ ۇلەسى 5،3 پايىزعا ۇلعايدى، - دەپ اتاپ ءوتتى ۆەدومستۆو باسشىسى.
ايتۋىنشا، ەكونوميكانىڭ ناقتى سەكتورىنا باعىتتالعان شىعىس 3،5 ترلن تەڭگەگە جەتەدى.
ناتيجەسىندە اتالعان سالاعا ارنالعان شىعىس 3،5 ترلن تەڭگە نەمەسە جالپى شىعىستاردىڭ 15،6 پايىز مولشەرىندە جوسپارلانىپ وتىر. بۇل ورتا مەرزىمدە ەلدىڭ دامۋىنا وڭ مۋلتيپليكاتيۆتىك اسەر ەتەدى. الەۋمەتتىك سالانىڭ شىعىسى 298 ملرد تەڭگەگە ۇلعايتىلدى جانە 8،5 ترلن تەڭگە نەمەسە بيۋدجەتتىڭ جالپى شىعىسىنىڭ 37،5 پايىزىن قۇرادى، - دەدى مينيستر.
سونىمەن قاتار ول قاراجاتتىڭ قايدا جۇمسالاتىنىن ناقتىلادى.
قاراجات «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋعا، مەكتەپكە دەيىنگى ءبىلىم بەرۋ مەكەمەلەرى پەداگوگتەرىنىڭ جالاقىسىن كوتەرۋگە جانە كوللەدج ستۋدەنتتەردىڭ ستيپەنديالارىن ۇلعايتۋعا، الەۋمەتتىك تولەمدەردىڭ، جاردەماقىلاردىڭ مولشەرلەرىن ارتتىرۋعا، دەنساۋلىق ساقتاۋ جۇيەسىن ودان ءارى دامىتۋعا باعىتتالادى. كۇش قۇرىلىمى شىعىسى 317 ملرد تەڭگەگە ءوسىپ، 2،5 ترلن تەڭگە كولەمىندە بولادى. ناقتىلاۋ كەزىندە اعىمداعى جىلى وڭىرلەرگە رەسپۋبليكالىق بيۋدجەتتەن 7،2 ترلن تەڭگە نەمەسە بيۋدجەتتىڭ جالپى شىعىسىنىڭ 32 پايىزى باعىتتالادى، - دەدى ۇكىمەت باسشىسىنىڭ ورىنباسارى.