اتالعان فاكتىگە قاتىستى تەرگەۋ امالدارى ءجۇرىپ جاتىر
جەتىسۋ وبلىسىندا اۋىل تۇرعىنىنان زاڭسىز اۋلانعان 100 كەلى بالىق تاركىلەندى. 63 جاستاعى ەر ادام كەربۇلاق اۋدانى سارىوزەك اۋىلىنىڭ ماڭىندا پروفيلاكتيكالىق ءىس-شارا بارىسىندا ۇستالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
ونىڭ كولىگىنەن بالىقتىڭ ءارتۇرلى تۇرلەرى مەن پايدالانۋعا تىيىم سالىنعان داراتالشىق تورلارى تابىلدى.
«تاركىلەنگەن بالىقتىڭ جالپى سالماعى - شامامەن 100 كەلى. بالىق ساتۋ ءۇشىن قابىلداۋ پۋنكتىنە وتكىزىلدى، ودان ءارى جينالعان قاراجات مەملەكەت كىرىسىنە تاپسىرىلادى. كەلگەن شىعىن 400 مىڭ تەڭگەگە جۋىق»، - دەيدى تابيعات قورعاۋ پوليسياسىنىڭ اعا ينسپەكتورى باعلان رىمجانوۆ.
اتالعان فاكتىگە قاتىستى قىلمىستىق كودەكستىڭ 335-بابىنا سايكەس تەرگەۋ امالدارى ءجۇرىپ جاتىر.