بۇل سەكتورعا وڭدەۋ ونەركاسىبىنىڭ جالپى قالالىق كولەمىنىڭ 28%-ى تيەسىلى.
قازاقستان رەسپۋبليكاسىنىڭ اۋىل شارۋاشىلىعى ءمينيسترى ەربول قاراشوكەيەۆ الماتىعا جۇمىس ساپارى اياسىندا الماتىنىڭ يندۋستريالىق ايماعىنداعى «BRB APK» ج ش س جىلىجاي كەشەنىنە باردى، دەپ حابارلايدى Almaty-akshamy.kz ق ر اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ.
قازىرگى تاڭدا اۋدانى 17 گا بولاتىن جىلىجايدا زاماناۋي گوللانديالىق تەحنولوگيالار (وسىمدىكتى توپىراقتا ەمەس، قورەكتىك ەرىتىندىدە ءوسىرۋ، تامشىلاتىپ سۋارۋ جۇيەسى جانە ت.ب.) قولدانىلادى، بۇل جىلىنا 7،2 مىڭ تونناعا دەيىن كوكونىستەر وسىرۋگە مۇمكىندىك بەرەدى. جوباعا 7،8 ملرد. تەڭگە ينۆەستيسيا سالىندى، 200 ادام جۇمىسپەن قامتىلعان.
2016 جىلى جىلىجاي ىسكە قوسىلعالى بەرى وتاندىق ءوندىرۋشى ىشكى نارىقتى جوعارى ساپالى كوكونىستەرمەن (قىزاناق، قيار، بولگار بۇرىشى، بايالدى جانە ت.ب.) قامتاماسىز ەتەدى.
ساپار بارىسىندا ەربول قاراشوكەيەۆ تاماق ونەركاسىبى سالاسىنداعى قايتا وڭدەۋ كاسىپورىندارى – «بەككەر جانە ك» ج ش س، «بيجان «ءموز» ج ش س، «ماسلودەل» ج ش س، «ەۋرازيان فۋدس كورپورەيشن» اق جانە ت.ب. باسشىلارىمەن كەزدەسىپ، تۇيتكىلدى ماسەلەلەر مەن الماتى قالاسىنىڭ قايتا وڭدەۋ سالاسىن ودان ءارى دامىتۋ جوسپارىن تالقىلادى.
الماتى - ەلىمىزدەگى ەڭ ءىرى ازىق-تۇلىك تاۋارلارىن تۇتىنۋشى مەن ءوندىرۋشىنىڭ ءبىرى. 2022 جىلدىڭ 11 ايىندا تاماق ونىمدەرىن ءوندىرۋ كولەمى 279،2 ملرد. تەڭگە بولدى، بۇل وتكەن جىلعا قاراعاندا 1،4%-عا ارتىق. قالا بويىنشا تاماق ونىمدەرىن ءوندىرۋ سالاسىندا 250-گە جۋىق (26 ءىرى جانە ورتا) كاسىپورىن جۇمىس ىستەيدى. بۇل سەكتورعا وڭدەۋ ونەركاسىبىنىڭ جالپى قالالىق كولەمىنىڭ 28%-ى تيەسىلى.