اۋىل شارۋاشىلىعى عىلىمىنداعى تىڭ جاڭالىق

قازاق عالىمدارى جىلقىنىڭ جاڭا ءتۇرىن شىعاردى. 

اباي وبلىسىنىڭ بەسقاراعاي اۋدانىندا ماماندار ۇزاق جىلعى سەلەكسيالىق جۇمىستاردىڭ ناتيجەسىندە قازاق جىلقىسىنىڭ «بەسقاراعاي زاۋىتتىق ءتيپىن» شىعاردى، دەپ حابارلايدى Almaty-akshamy.kz.

بۇل – تاۋەلسىزدىك جىلدارىنداعى مال اسىلداندىرۋ سالاسىنداعى عالىمداردىڭ العاشقى جەتىستىگى.

«تاريحقا قاراپ وتىرساق، جىلقى قازاق جەرىندە ۇيرەتىلگەن. بوتاي قازباسى دا ونى دالەلدەدى. تۇرىكمەندەردە اقالتەكە بار، ارابتاردىڭ تازا قاندى تۇلپارى بار، انگليادا تازا قاندى جىلقى بار. ويلانا كەلە، قازاق جىلقىسىنىڭ دا ساپاسىن سونداي دەڭگەيگە نەگە كوتەرمەسكە دەگەن ارمان بولدى»، - دەيدى شارۋا قوجالىعىنىڭ يەسى حابيدوللا مۇقينوۆ. 

قازاقى جىلقىلاردى بۋدانداستىرۋ ارقىلى جاڭا تيپ شىعارۋ جۇمىستارى 1968 جىلدان باستالدى. سودان بەرگى بىرنەشە بۋىن عالىمداردىڭ ەڭبەگى جەمىسىن بەرىپ وتىر.

«ەگەمەندىك العان كەزدەن ءبىرىنشى رەت «بەسقاراعاي ءتيپى» جىلقى شارۋاشىلىعىندا بەكىپ وتىر. قازاقتىڭ ءوزىنىڭ ءار جەردە شىققان تيپتەرىن قوسۋ ارقىلى، جەرگىلىكتى جىلقىنى ىرىلەتىپ، سالماعىن جوعارىلاتىپ. ورماندى جەرگە بەيىمدەلگەن. ءتولدى جاقسى بەرەدى»، - دەيدى اۋىل شارۋاشىلىعى عىلىمدارىنىڭ كانديداتى قايرات يسحان. 

شويىنقارا مەن بايتورى جىلقىسىنىڭ ءتىرى سالماعى 700 كەلىگە دەيىن بارادى. قۇيرىق-جالى توگىلگەن قۇرىش تۇياقتىلار پاتەنتتەلگەنگە دەيىن ءتۇرلى كورمەلەردە تالايلاردى تاڭداي قاقتىرعان. ءقازىر شارۋاشىلىقتا جىلقى سانى 200-دەن اسادى. الداعى ۋاقىتتا سانىن كوبەيتىپ اسىلداندىرۋ جۇمىستارى جالعاسا بەرمەك.