بۇگىن ەلوردادا «اۋىل» پارتياسى ساياسي كەڭەسىنىڭ كەڭەيتىلگەن وتىرىسى ءوتتى، - دەپ حابارلايدى Aqshamnews.kz.
جيىن بارىسىندا پارتيا مۇشەلەرى، پارلامەنت دەپۋتاتتارى مەن قوعام بەلسەندىلەرى ق ر كونستيتۋسياسىنىڭ جاڭا جوباسىن تالقىلاپ، ەلىمىزدىڭ ساياسي جاڭعىرۋ جولىنداعى تاريحي قادام رەتىندە ءبىراۋىزدان قولداۋ ءبىلدىردى.
جيىندى اشقان پارتيا ءتوراعاسى، كونستيتۋسيالىق رەفورما جونىندەگى كوميسسيانىڭ مۇشەسى سەرىك ەگىزبايەۆ بايانداما جاسادى. ول جاڭا كونستيتۋسيانى ەل دامۋىنىڭ جاڭا فيلوسوفياسى جانە «ادىلەتتى قازاقستاننىڭ» قۇقىقتىق ىرگەتاسى دەپ اتادى.
«بۇل قۇجات - مەملەكەت باسشىسى قاسىم-جومارت توقايەۆ ۇسىنعان ساياسي رەفورمالاردىڭ زاڭدى جالعاسى. جاڭا ءبىر پالاتالى پارلامەنت - قۇرىلتايدىڭ قۇرىلۋى پارتيالىق جۇيەنى جانداندىرىپ، اۋىل ەڭبەككەرلەرىنىڭ مۇددەسىن جاڭا دەڭگەيدە قورعاۋعا جول اشادى. ءبىز ءۇشىن باستى بايلىق - تابيعي رەسۋرس ەمەس، ءبىلىمدى، ادال ءارى باسەكەگە قابىلەتتى ازامات»، - دەپ اتاپ ءوتتى س. ەگىزبايەۆ.
وتىرىس بارىسىندا كۇن تارتىبىنە سايكەس ساياسي رەفورمانىڭ نەگىزگى باعىتتارى بويىنشا جارىسسوزدەر جۇرگىزىلىپ، سپيكەرلەر ءوز تۇجىرىمدارىن ورتاعا سالدى.
پارلامەنت ءماجىلىسىنىڭ دەپۋتاتى جيگۋلي دايرابايەۆ 145 دەپۋتاتتان تۇراتىن قۇرىلتايدىڭ تاريحي ماڭىزىنا توقتالدى. ونىڭ ايتۋىنشا، ءبىر پالاتالى مودەل بيۋروكراتيالىق كەدەرگىلەردى جويىپ، بيلىك تەتىكتەرىنىڭ اشىقتىعى مەن تيىمدىلىگىن ارتتىرادى.
پارتيا ارداگەرى مىناۋتاۋبيىك انەسوۆ اتا زاڭدا تاريحي-مادەني مۇرانى ساقتاۋ مەن «ءدىن مەملەكەتتەن بولەك» قاعيداتىنىڭ ناقتىلانۋىن جوعارى باعالادى. «بۇل نورمالار ۇلتتىق قۇندىلىقتاردى قورعاۋدىڭ قۇقىقتىق كەپىلى بولماق»،-دەدى ول ءوز سوزىندە.
تۇركىستان وبلىستىق فيليالىنىڭ وكىلى، وبلىستىق ءماسليحات دەپۋتاتى نۇرجان اجىمەتوۆ پروپورسيونالدى سايلاۋ جۇيەسى پارتيالىق جاۋاپكەرشىلىكتى ارتتىراتىنىن، ال ۆيسە-پرەزيدەنت لاۋازىمى مەملەكەتتىك باسقارۋدىڭ ساباقتاستىعىن قامتاماسىز ەتەتىنىن جەتكىزدى.
ساياسي كەڭەس مۇشەسى، سولتۇستىك قازاقستان وبلىستىق ءماسليحات دەپۋتاتى ولگا كليشينا زاڭ شىعارۋ باستاماسىنا يە بولاتىن حالىق كەڭەسىنىڭ ءرولىن ەرەكشە اتادى. ول بۇل ينستيتۋتتى بيلىك پەن قوعام اراسىنداعى، اسىرەسە اۋىل تۇرعىندارى ءۇشىن ءتيىمدى «التىن كوپىر» دەپ سيپاتتادى.
قىزىلوردا وبلىستىق فيليالىنىڭ ءتوراعاسى، وبلىستىق ءماسليحات دەپۋتاتى سادىق مۇستافا رەفورمانىڭ حالىقتىق سيپاتىنا توقتالدى. ول پرەزيدەنتتىڭ كونستيتۋسيالىق رەفورمانى جالپىحالىقتىق رەفەرەندۋم ارقىلى جۇزەگە اسىرۋ تۋرالى باستاماسىن دەموكراتيانىڭ ەڭ جوعارعى كورىنىسى دەپ اتادى.
«كونستيتۋسيانىڭ جاڭا رەداكسياسىندا بيلىكتىڭ بىردەن-بىر باستاۋى حالىق ەكەنى ناقتى بەكىتىلەدى. رەفەرەندۋم ارقىلى ءاربىر ازامات مەملەكەت تاعدىرىنا تىكەلەي ىقپال ەتەتىن بەلسەندى قاتىسۋشىعا اينالادى. بۇل - بيلىك پەن حالىق اراسىنداعى سەنىمدى نىعايتاتىن ادىلەتتى جول»، - دەدى ول.
قوستاناي وبلىستىق فيليالىنىڭ وكىلى، وبلىستىق ءماسليحات دەپۋتاتى دينارا احمەتوۆا ايەلدەر مەن جاستارعا ارنالعان 30 پايىزدىق كۆوتانىڭ ساقتالۋىنىڭ ماڭىزدىلىعىن اتاپ ءوتىپ، مۇنى اۋىل ليدەرلەرى ءۇشىن ناقتى «الەۋمەتتىك ليفت» دەپ باعالادى.
جيىن سوڭىندا «اۋىل» پارتياسى ساياسي كەڭەسىنىڭ مۇشەلەرى قازاقستان حالقى مەن پارتيالاستارعا ۇسىنىلعان كونستيتۋسيا جوباسىن مۇقيات زەردەلەۋگە، ونى جان-جاقتى ءتۇسىندىرۋ جۇمىستارىن جانداندىرۋعا جانە شىندىققا جاناسپايتىن ارانداتۋشىلىق جاريالانىمداردىڭ جەتەگىندە كەتپەۋگە شاقىراتىن ۇندەۋ قابىلدادى.