الماتى №4 قالالىق كلينيكالىق اۋرۋحاناعا 1929 جىلى تۋعان ەلەنا نەيفەلد اۋىر حالدە جەتكىزىلدى. مۇنداي جاستا اياق سۇيەكتەرىنىڭ اشىق ءارى كۇردەلى سىنۋى كوبىنە تىرەك-قيمىل قابىلەتىنىڭ جوعالۋىنا، ۇزاق ۋاقىت قوزعالىسسىز جاتۋعا اكەلەتىنى بەلگىلى. دارىگەرلەر باستى ماقساتتى - ناۋقاستىڭ قايتا ءجۇرىپ كەتۋىنە مۇمكىندىك بەرۋدى ايقىنداپ الدى.
ناۋقاستىڭ جاعدايى انەستەزيولوگيا، رەانيماسيا جانە قارقىندى تەراپيا ءبولىمىنىڭ مەڭگەرۋشىسى مەن تراۆماتولوگ-ورتوپەد دارىگەرلەردىڭ قاتىسۋىمەن وتكەن كوپبەيىندى كونسيليۋمدا جان-جاقتى تالقىلاندى. ءقاۋىپ جوعارى بولعانىنا قاراماستان، مەديسينالىق كوماندا وتا جاساۋ جونىندە ورتاق شەشىمگە كەلدى.
وتا ەكى كەزەڭدە جۇرگىزىلدى. الدىمەن حيرۋرگ ماماندار جارانى مۇقيات تازالاپ، تىرشىلىككە قابىلەتسىز ءتىندى الىپ تاستاپ، جۇمساق تىنگە پلاستيكا جاسادى. كەيىن سۇيەككە يليزاروۆ اپپاراتى ارقىلى سۇيەكارالىق وستەوسينتەز جۇرگىزىلدى. بۇل قۇرىلعى سۇيەكتى بەرىك بەكىتىپ، ولاردىڭ دۇرىس ءارى ساپالى بىتۋىنە جاعداي جاسايدى. وتا 2 ساعات 45 مينۋتقا سوزىلدى، - دەپ حابارلايدى Aqshamnews.kz.
وتا جاساعان بريگادا قۇرامىندا: حيرۋرگ - رۋسلان روزييەۆ؛ حيرۋرگ اسسيستەنتتەرى - تالعات بيجانوۆ، رەزيدەنت باقىت قورقىت، دىنمۇحاممەد ابدۋلدايەۆ؛
انەستەزيولوگ - ەرتۋعان توقتاربايەۆ؛ وتالىق مەدبيكە - گۇلميرا الداشوۆا بولدى.
ءقازىر ەلەنا ياكوۆليەۆنا ۇيىندە. جاراسىنىڭ جازىلۋى جاقسى، سۇيەكتەر دۇرىس بەكىتىلگەن. ەڭ باستىسى - ونىڭ قايتادان اياعىنان تۇرىپ، وڭالتۋ كەزەڭىن باستاۋىنا ناقتى مۇمكىندىك بار.
دارىگەرلەردىڭ ايتۋىنشا، جاقىندارىنىڭ قامقورلىعى مەن جۇيەلى جاتتىعۋدىڭ ارقاسىندا ول تاياق نەمەسە ءجۇرىس قۇرالىن پايدالانىپ تا، وزدىگىنەن دە قوزعالا الادى.
«جاس - ۇكىم ەمەس. ءبىز ءاردايىم ناقتى جاعدايعا قاراپ، كومەكتەسۋدىڭ جولىن ىزدەيمىز. باستى ماقسات - اياقتى ساقتاپ قالىپ، ادامعا قوزعالۋ مۇمكىندىگىن قايتارۋ بولدى. ءقازىر ءبارى ويداعىداي ءوتىپ جاتىر. بۇل - ءبىز ءۇشىن ۇلكەن جەڭىس»، - دەيدى №4 قكا تراۆماتولوگى رۋسلان روزييەۆ.
الماتى №4 قكا دارىگەرلەرى ەڭ كۇردەلى، ءۇمىتى از جاعدايدىڭ وزىندە كاسىبيلىك پەن تاباندىلىق شەشۋشى ءرول اتقاراتىنىن تاعى ءبىر مارتە دالەلدەدى.
№4 قكا - جىل سايىن اۋىر جاراقات العان جانە كۇردەلى دەرتكە شالدىققان جۇزدەگەن ناۋقاسقا كومەك كورسەتەتىن ءىرى كوپبەيىندى ستاسيونار.