29 جىل ىشىندە ءبىلىم سالاسى ءۇشىن 1058 مامان شەتەلدە دايارلاندى
الماتى وبلىسى جىبەك جولى اۋىلىنداعى ورتا مەكتەپتىڭ ماتەماتيكا پانىنەن ءمۇعالىمى مارجان ەرجان «بولاشاق» باعدارلاماسىمەن اقش-تىڭ دوكتورانتۋراسىندا وقيتىن بولادى. «بولاشاق» ستيپەندياتى وڭتۇستىك كاليفورنيا ۋنيۆەرسيتەتىندە ءبىلىم سالاسىنداعى باسقارۋدى زەرتتەيدى، دەپ حابارلايدى Almaty-akshamy.kz.
«اتا-انامنىڭ جولىن قۋىپ، ۇستاز بولسام دەگەن ارمان پايدا بولدى. اۋىل مەكتەبىندە ماتەماتيكادان ساباق بەرەمىن، كوپبالالى وتباسىدان بالالارعا اعىلشىن ءتىلىن تەگىن ۇيرەتەمىن. ءوزىم دە اۋىل مەكتەبىن ءبىتىردىم. شەتەلدە وقۋعا مۇمكىندىگىم بولادى دەپ ويلاماپپىن. «بولاشاق» باعدارلاماسىنىڭ ارقاسىندا وتانداستارىمىز الەمنىڭ ۇزدىك جوعارى وقۋ ورىندارىندا اكادەميالىق ءبىلىم الىپ، عىلىمي دارەجە الۋعا مۇمكىندىك الدى. اقش-تىڭ دوكتورانتۋراسىن بىتىرگەننەن كەيىن ەلىمىزدىڭ ءبىلىم سالاسىن دامىتۋعا ءوز ۇلەسىمدى قوسقىم كەلەدى»، – دەپ اتاپ ءوتتى مارجان ەرجان.
«بولاشاق» حالىقارالىق ستيپەندياسى جۇزەگە اسىرىلىپ كەلە جاتقان 29 جىل ىشىندە ءبىلىم سالاسى ءۇشىن 1058 مامان شەتەلدە دايارلاندى. قازىرگى تاڭدا ولار باستاۋىش، ورتا، جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىندا جۇمىس ىستەيدى.
ەستەرىڭىزگە سالا كەتەيىك، وسى جىلدىڭ 14 قازانىنا دەيىن «بولاشاق» باعدارلاماسىمەن اكادەميالىق وقۋ مەن تاعىلىمدامادان وتۋگە قۇجاتتار eGov.kz مەملەكەتتىك قىزمەتتەر پورتالىندا قابىلدانادى.