قازاق ۇلتتىق قىزدار پەداگوگيكالىق ۋنيۆەرسيتەتى HertsCam Network جانە Teachers Lab ىنتىماقتاستىق تۋرالى ءۇشجاقتى مەموراندۋمعا قول قويدى.
ەستەرىڭىزگە سالساق، قازاقستان مەن ۇلىبريتانيانىڭ ءبىلىم بەرۋ مەكەمەلەرى اراسىنداعى بايلانىستى نىعايتۋ ماقساتىندا HertsCam Network جەلىسىنىڭ ديرەكتورى ديەۆيد فروست قازاق ۇلتتىق قىزدار پەداگوگيكالىق ۋنيۆەرسيتەتىنە كەلگەن بولاتىن. ناتيجەسىندە، تاراپتار ءبىلىم مەن عىلىم سالاسىندا ستراتەگيالىق ارىپتەس بولۋعا كەلىستى. مەموراندۋمعا قول قويۋ ءراسىمى الماتىداعى UNESCO كەڭسەسىندە ءوتتى، دەپ حابارلايدى اlmaty-akshamy.kz.
قۇجاتتا جوعارى جانە جوعارى وقۋ ورنىنان كەيىنگى ءبىلىم بەرۋ، عىلىم، مادەنيەت جانە ونەر، عىلىمي-زەرتتەۋ سالالارىنداعى ىنتىماقتاستىقتى دامىتۋدىڭ نەگىزگى باعىتتارى كورسەتىلگەن. سونداي-اق تاراپتار وقۋ، ءادىسنامالىق جانە عىلىمي-زەرتتەۋ جۇمىستارىنىڭ تيىمدىلىگىن ارتتىرادى.
قۇجاتتىڭ ماڭىزدى بولىگىنىڭ ءبىرى – اۋىل مۇعالىمدەرىن قولداۋ، اتاپ ايتقاندا ولاردىڭ كاسىبي دامۋىنا جاعداي جاساۋ. ول ءۇشىن «اۋىلدىق مەكتەپ شامى» جوباسى ىسكە اساتىن بولادى. جوبا مۇعالىمدەردىڭ كوشباسشىلىق قاسيەتتەرىن دامىتۋدى، سونداي-اق بريتاندىق تاجىريبە نەگىزىندە زاماناۋي كوللابوراسيا مودەلىن ازىرلەۋدى، اۋىل مەكتەپتەرى مەن پەداگوگيكالىق ۋنيۆەرسيتەتتىڭ اراسىنداعى بايلانىستى نىعايتا ءتۇسۋدى كوزدەيدى. بۇل تاجىريبە ودان ءارى قازاقستاننىڭ باسقا دا اۋماقتارىنا اۋىل مەكتەپتەرىن دامىتۋ ماقساتىندا تاراتىلاتىن بولادى.
قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى گۇلميرا قاناي اۋىل مۇعالىمدەرىنە جوبانى تانىستىرۋ ءۇشىن الماتى وبلىسىنداعى 6 ءبىلىم وشاعىن ارالاعان بولاتىن. وندا ۇستازدارمەن كەزدەسىپ، جوبا تۋرالى ەگجەي-تەگجەيلى باياندادى.
ايتا كەتەيىك، جوعارى ءبىلىم مەن عىلىمدى دامىتۋ جانە اۋىل مۇعالىمدەرىن قولداۋ بويىنشا ءۇشجاقتى مەموراندۋمعا UNESCO-نىڭ قولداۋىمەن قول قويىلدى.