بۇل تۋرالى ۇلتتىق ەكونوميكا ءمينيسترى الىبەك قۋانتىروۆ مالىمدەدى.
بيىل 736 اۋىلدا 143 ملرد تەڭگەنىڭ 1،5 مىڭ جوباسى ىسكە اسىرىلادى، دەپ حابارلايدى Almaty-akshamy.kz
ءمينيستردىڭ ايتۋىنشا، ءقازىر رەسپۋبليكادا 6 293 اۋىلدىق ەلدى مەكەن بار، وندا 7،8 ملن جۋىق ادام تۇرادى. «اۋىل – ەل بەسىگى» جوباسىن ىسكە اسىرۋ ءۇشىن ەلدەگى اۋىلداردىڭ جالپى سانىنان دامۋ الەۋەتى جوعارى، اۋىل تۇرعىندارىنىڭ 90% قامتىلعان 3،5 مىڭ اۋىل ىرىكتەلدى. ەلدى مەكەندەردى دامىتۋ ءۇشىن 2019-2022 جىلدارى رەسپۋبليكالىق بيۋدجەتتەن 326 ملرد تەڭگە ءبولىنىپ، 3،7 مىڭ جوبا ىسكە اسىرىلدى.
«2023 جىلى مينيسترلىك وبلىس اكىمدىكتەرىمەن بىرلەسىپ 736 اۋىلدىق ەلدى مەكەندە 143 ملرد تەڭگە سوماسىنا 1،5 مىڭ جوبانى ىسكە اسىرۋدى جوسپارلاپ وتىر. ونىڭ ىشىندە 102 ملرد تەڭگەسى جالپى سيپاتتاعى ترانسفەرتتەردە ەسەپتەلىپ جەرگىلىكتى بيۋدجەتتەردىڭ شىعىستار بازاسىنا بەرىلدى»، - دەدى مينيستر.
ايتۋىنشا، بۇل تۇرعىن ۇي-كوممۋنالدىق شارۋاشىلىق سالاسىنداعى 119 جوبانى، الەۋمەتتىك ينفراقۇرىلىمنىڭ 275 جوباسىن، ونىڭ ىشىندە 91 ءبىلىم بەرۋ، 45 دەنساۋلىق ساقتاۋ، 139 مادەنيەت جانە سپورت سالاسىنداعى جوبالاردى ىسكە اسىرۋعا جانە اۋىلىشىلىك جولداردى جاقسارتۋعا باعىتتالعان 1،1 مىڭ جوبانى ورىنداۋعا مۇمكىندىك بەرەدى.
قازىرگى تاڭدا ساپالىق كورسەتكىشتەر ەنگىزىلىپ، وڭىرلىك ستاندارتتار جۇيەسىنىڭ جاڭا فورماتى ازىرلەندى.
سونىمەن قاتار، پرەزيدەنتتىڭ جارلىعىنا سايكەس، قازىرگى ۋاقىتتا ۇلتتىق ەكونوميكا مينيسترلىگى اۋىلدىق اۋماقتاردى دامىتۋدىڭ 2023-2027 جىلدارعا ارنالعان تۇجىرىمداماسىنىڭ جوباسىن ازىرلەدى.
تۇجىرىمدامانىڭ نەگىزگى ماقساتى – ينستيتۋسيونالدىق قامتاماسىز ەتۋدى ىلگەرىلەتۋ ارقىلى اۋىلدىق اۋماقتاردى دامىتۋ تاسىلدەرىنىڭ تيىمدىلىگىن ارتتىرۋ، سونداي-اق اۋىل حالقىنىڭ ءومىر ءسۇرۋ ساپاسىن جوعارىلاتۋ جانە جايلى ءومىر ءسۇرۋ ورتاسىن قۇرۋ.
تۇجىرىمداما مىناداي تاسىلدەردەن تۇرادى: اۋىلدىڭ ينستيتۋسيونالدىق دامۋىن قامتاماسىز ەتۋ، الەۋمەتتىك، ينجەنەرلىك جانە كولىك ينفراقۇرىلىمىن قارقىندى دامىتۋ.
سونداي-اق اگروونەركاسىپ كەشەنىن، كاسىپكەرلىكتى، اۋىل شارۋاشىلىعى كووپەراسياسىن دامىتۋ ارقىلى اۋىل حالقىنىڭ تابىس دەڭگەيىن ارتتىرۋ كوزدەلگەن.
«اۋىل – ەل بەسىگى» جوباسىن ىسكە اسىرۋ ۇلتتىق ەكونوميكا مينيسترلىگىنىڭ تۇراقتى باقىلاۋىندا»، - دەدى قۋانتىروۆ.