«اۋىل - ەل بەسىگى» باعدارلاماسىنا بولىنگەن قارجىنى قاي وبلىستار يگەرە الماي كەلەدى؟

پرەمەر-مينيستر قارجىنى يگەرە الماي وتىرعان وبلىس اكىمدەرىن سىنعا الدى.

ەلدىمەكەندەردى كوركەيتۋى ءتيىس جوبا قالاي ىسكە اسىپ جاتقانى ۇكىمەتتە قارالدى، دەپ حابارلايدى Almaty-akshamy.kz.

 «اۋىل - ەل بەسىگى» جوباسىنا سوڭعى 3 جىلدا 326 ميلليارد تەڭگە بولىنگەن. بۇل اقشاعا سۋ تارتىپ، جول سالۋ سەكىلدى 3،5 مىڭنان استام جوبا جۇزەگە استى. بيىل دا 800 اۋىلدى كوركەيتۋ ءۇشىن قوماقتى قارجى بولىنگەن. دەسە دە كەيبىر ءوڭىر اكىمدىكتەرى سول قولدا بار اقشانى ۋاقىتىندا يگەرە الماي وتىر.

«بولىنگەن قارجىنى يگەرۋ سەرپىنى پاۆلودار، اقتوبە جانە قىزىلوردا وبلىستارىندا جاقسى. الايدا الماتى جانە ۇلىتاۋ وبلىستارىندا دەڭگەي تومەن. بيۋدجەت قاراجاتىن ءتيىمسىز جوسپارلاۋ جانە پايدالانۋ، تەندەرلەردى ۋاقىتىندا وتكىزبەۋ، ءتيىستى باقىلاۋدىڭ بولماۋى وبەكتىلەردى ەنگىزۋ مەرزىمدەرىنىڭ بۇزىلۋىنا اكەلەدى»، - دەيدى ق ر پرەمەر-مينيسترى ءاليحان سمايىلوۆ. 

ماسەلەن، اكىمدىكتەر ءىستى سوزبالاڭعا سالعان سوڭ ۇلىتاۋ وبلىسىندا 4 اۋىلعا قاراستى اۋرۋحانا ءالى كۇنگە دەيىن سالىنىپ بىتپەگەن. ال سولتۇستىك قازاقستانداعى مۇسىرەپوۆ اۋدانىندا نەبارى 53 شاقىرىم جولدىڭ قۇرىلىسى بىلتىر اياقتالۋى كەرەك ەدى. الايدا جۇمىستىڭ جارتىسى ءالى اياقتالعان جوق.