بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترى الىبەك قۋانتىروۆ ايتتى.
«اۋىل اماناتى» جوباسىن ىسكە اسىرۋدا 17 مىڭ جەڭىلدەتىلگەن نەسيە بەرىلەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءىس-شارالار كەشەنىنىڭ ءبىرىنشى باعىتى – «ءونىم ءوندىرۋ كولەمىن ۇلعايتۋ». بۇل باعىت وندىرۋشىلەر اراسىندا الەۋمەتتىك-كاسىپكەرلىك كورپوراسيالار مەن اۋىل شارۋاشىلىعى تاۋارلارىن تىكەلەي ساتىپ الۋدان فورۆاردتىق شارتتار جاساسۋعا كوشۋ جولىمەن تۇراقتاندىرۋ قورلارىنىڭ جۇمىسىن قايتا فورماتتاۋ جونىندەگى شارالاردى قامتيدى. سونداي-اق، بيىل 17 مىڭ جەڭىلدەتىلگەن شاعىن نەسيە بەرۋگە، 18 مىڭ جۇمىس ورنىن قۇرۋعا باعىتتالعان اۋىل حالقىنىڭ تابىسىن ارتتىرۋ جونىندەگى «اۋىل اماناتى» جوباسىن ىسكە اسىرۋ باستالادى»، - دەدى الىبەك قۋانتىروۆ.
سونىمەن قاتار ول جاڭا ءسۇت-تاۋارلى فەرمالاردى قۇرۋ جانە جۇمىس ىستەپ تۇرعاندارىن كەڭەيتۋ بويىنشا 24 جوبانى جەڭىلدەتىلگەن قارجىلاندىرۋ ارقىلى سولتۇستىك قازاقستان وبلىسىنىڭ تاجىريبەسى قولدانىلاتىنىن ايتتى.
«ىشكى نارىقتىڭ قاجەتتىلىگىن قامتاماسىز ەتۋ ماقساتىندا قۇرىلىس ماتەريالدارىن، جەڭىل، حيميا جانە فارماسيەۆتيكا ونەركاسىبى تاۋارلارىن ءوندىرۋ بويىنشا يمپورتتى الماستىراتىن جوبالاردى ىسكە اسىرۋ جالعاستىرىلادى. سونداي-اق، وسى جىلى قۇس ەتىن ءوندىرۋ بويىنشا 19 جوبانى جانە ەت ونىمدەرىن وڭدەۋ بويىنشا 17 جوبانى ىسكە اسىرۋ باستالادى. بۇل 249 مىڭ توننا قۇس ەتىن جانە 32 مىڭ توننا ەت ونىمدەرىن وندىرۋگە مۇمكىندىك بەرەدى»، - دەدى مينيستر.