بيىل «اۋىل اماناتى» باعدارلاماسى اياسىندا 17 مىڭنان استام جاڭا جۇمىس ورنى قۇرىلادى. بۇل تۋرالى سەنات دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان، دەپ حابارلايدى اlmaty-akshamy.kz.
«ۇكىمەت «جايلى مەكتەپ»، «اۋىلدا دەنساۋلىق ساقتاۋدى جاڭعىرتۋ»، تۇرعىن ۇي-كوممۋنالدىق ينفراقۇرىلىمدى دامىتۋدىڭ 2023-2029 جىلدارعا ارنالعان تۇجىرىمداماسى، قازاقستان رەسپۋبليكاسىنىڭ اگروونەركاسىپتىك كەشەنىن دامىتۋدىڭ 2021-2030 جىلدارعا ارنالعان تۇجىرىمداماسى، «ءبىر اۋىل – ءبىر ءونىم»، «اۋىل – ەل بەسىگى» جانە تاعى باسقا باعدارلامالىق قۇجاتتاردىڭ ەرەجەلەرى ينتەگراسيالانعان قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023-2027 جىلدارعا ارنالعان تۇجىرىمداماسىن قابىلداپ، ىسكە اسىرۋدا. اۋىل حالقىنىڭ تابىسىن ارتتىرۋ ءۇشىن «اۋىل اماناتى» باعدارلاماسى جۇزەگە اسىرىلۋدا. باعدارلاما اياسىندا اۋىل شارۋاشىلىعى كووپەراتيۆتەرىن دامىتۋ ءۇشىن كرەديت بەرۋ (8 مىڭ اەك-كە دەيىن) كوزدەلگەن. بۇل اۋىل شارۋاشىلىق تەحنيكاسىن، قاجەتتى جابدىقتاردى ساتىپ الۋ، وسىمدىك جانە مال شارۋاشىلىعى ونىمدەرىن قايتا وڭدەۋ جونىندەگى شاعىن سەحتاردى اشۋ بويىنشا ىنتالاندىرۋ بولادى»، - دەدى ۇكىمەت باسشىسى جاۋابىندا.
پرەمەر-مينيستردىڭ دەرەگىنشە، باعدارلاما بويىنشا 2023 جىلى 74،8 ملرد تەڭگە سوماسىنا 12،1 مىڭ ميكروكرەديت بەرىلدى. ونىڭ 5،8 ملرد تەڭگە كرەديت قاراجاتىن 287 اۋىل شارۋاشىلىعى كووپەراتيۆى الدى. 2024 جىلعا 16،7 مىڭ ميكروكرەديت بەرۋ جوسپارىمەن 100 ملرد تەڭگە ءبولۋ كوزدەلگەن. بۇل اۋىلدا 17 مىڭنان استام جاڭا جۇمىس ورنىن قۇرۋعا مۇمكىندىك بەرەدى. بۇدان باسقا، اگرو ونەركاسىپتىك كەشەن سالاسىنا، ونىڭ ىشىندە اۋىل شارۋاشىلىعى ونىمدەرىن قايتا وڭدەۋگە ينۆەستيسيالار تارتۋ بويىنشا جۇمىستار جۇرگىزىلۋدە.
«ماسەلەن، 2023-2026 جىلدارعا ارنالعان اگروونەركاسىپتىك كەشەن ينۆەستيسيالىق جوبالارىن ىسكە اسىرۋ جونىندەگى جول كارتاسى اياسىندا 2023 جىلى 3 856 جاڭا جۇمىس ورنىن قۇرا وتىرىپ، 275،6 ملرد تەڭگە سوماسىنا 289 ينۆەستيسيالىق جوبا پايدالانۋعا بەرىلدى. ونىڭ ىشىندە ەلدىڭ شەكارالاس وڭىرلەرىندە 224،8 ملرد تەڭگە سوماسىنا 3 مىڭ جۇمىس ورنىن قۇرا وتىرىپ، 222 ينۆەستيسيالىق جوبا ىسكە اسىرىلدى. بۇل ينۆەستيسيالىق جوبالار جەڭىلدەتىلگەن كرەديتتەۋ، سۋبسيديالاۋ، جەر رەسۋرستارى جانە قاجەتتى ينفراقۇرىلىممەن قامتاماسىز ەتىلگەن. سونىمەن قاتار «مەن كاسىپكەر» قۇرالى اياسىندا «ءبىر اۋىل – ءبىر ءونىم» جوباسى ىسكە اسىرىلۋدا. بۇل جوبا قولدانىستاعى قوسىلعان قۇن وندىرىستىك تىزبەكتەرىنە ەكسپورتتاۋ نەمەسە ءوندىرۋ ءۇشىن نارىقتىق الەۋەتى بار وڭىرلەردەگى پەرسپەكتيۆالى تاۋارلاردى انىقتاۋعا مۇمكىندىك بەرەدى. بۇدان باسقا، تۇجىرىمدامانى ىسكە اسىرۋ اياسىندا دامۋ الەۋەتى جوعارى اۋىلدىق ەلدى مەكەن (تىرەك، سپۋتنيكتىك اەم) تىزبەلەرى وزەكتەندىرىلىپ، ءاربىر ءوڭىر بويىنشا اۋىلدىق اۋماقتاردى دامىتۋ جول كارتالارى بەكىتىلدى»، - دەدى ولجاس بەكتەنوۆ.