اكىمدەر سايلاۋى كەزىندە ورتالىق سايلاۋ كوميسسياسى ءوز وكىلەتتىكتەرى شەڭبەرىندە اۋماقتىق سايلاۋ كوميسسيالارىنا ءادىسنامالىق كومەك كورسەتەتىپ، سايلاۋ قۇجاتتارىنىڭ نىساندارىن بەلگىلەيدى جانە سايلاۋ ءىس-شارالارىن قارجىلاندىرۋدى قامتاماسىز ەتەدى.
بۇل تۋرالى ورتالىق سايلاۋ كوميسسياسىنىڭ مۇشەسى ەرلان داۋىلبايەۆ باياندادى دەپ حابارلايدى Almaty-akshamy.kz "ەگەمەن قازاقستان" باسىلىمىنا سىلتەمە جاساپ.
«سايلاۋ تۋرالى» كونستيتۋسيالىق زاڭنىڭ 113-1-بابىنا سايكەس، سايلاۋ تاعايىنداۋ ءۇشىن مىنالار نەگىز بولىپ تابىلادى. ءبىرىنشى – اۋداندىق ماڭىزى بار قالا، اۋىل، كەنت، وكرۋگ اكىمىنىڭ زاڭمەن بەلگىلەنگەن وكىلەتتىلىك مەرزىمىنىڭ اياقتالۋى. ەكىنشى – اۋداندىق ماڭىزى بار قالا، اۋىل، كەنت، وكرۋگ اكىمى وكىلەتتىگىن مەرزىمىنەن بۇرىن توقتاتۋ نەمەسە زاڭدا بەلگىلەنگەن جاعدايلاردا ءتيىستى اكىمشىلىك اۋماقتىق بىرلىكتى قايتا ۇيىمداستىرۋ. «سايلاۋ تۋرالى» كونستيتۋسيالىق زاڭعا سايكەس سايلاۋدى اۋماقتىق سايلاۋ كوميسسيالارى كەمىندە 40 كۇن بۇرىن تاعايىندايدى جانە جۇمىس ىستەپ وتىرعان اكىمنىڭ وكىلەتتىك مەرزىمى اياقتالعانعا دەيىن كەمىندە 10 كۇن بۇرىن وتكىزەدى»، – دەدى ەرلان داۋىلبايەۆ.
ونىڭ ايتۋىنشا، اكىمنىڭ وكىلەتتىلىگى مەرزىمىنەن بۇرىن توقتاتىلعان جاعدايدا سايلاۋ تاعايىندالعان كۇننەن باستاپ 1 اي ىشىندە تاعايىندالادى جانە 1 اي مەرزىمدە وتكىزىلەدى. ياعني ناۋقان ۇزاقتىعى – 1 اي، ۇسىنۋ ءۇشىن – 2 اپتا، تىركەۋ كەزەڭى 10 كۇن بۇرىن اياقتالادى. سايلاۋ كۇنى تۋرالى حابار جەرگىلىكتى بۇقارالىق اقپارات قۇرالدارىندا جاريالانادى.
«كانديداتتاردى ۇسىنۋ سايلاۋ تاعايىندالعان كۇننەن كەيىنگى كۇنى باستالادى جانە سايلاۋ وتكىزىلەتىن ۋاقىتقا 15 كۇن قالعاندا جەرگىلىكتى ۋاقىتپەن ساعات 18.00-دە اياقتالادى. ەگەر ۇسىنۋ مەرزىمى اياقتالاتىن كۇنگە دەيىن اۋىلدىق ماڭىزى بار قالا، اۋىل، كەنت، اۋىل وكرۋگىنە ەكەۋدەن كەم كانديدات ۇسىنىلسا، وندا اۋداندىق سايلاۋ كوميسسياسى كانديداتتاردى ۇسىنۋدى 5 كۇننەن اسپايتىن مەرزىمگە ۇزارتادى. كانديداتتاردى ۇسىنۋدىڭ بىرنەشە ءتاسىلى بار. ءبىرىنشى، ساياسي پارتيالار ءوز مۇشەلەرىنىڭ اراسىنان ۇسىنادى. بۇل رەتتە ساياسي پارتيا ءبىر سايلاۋ وكرۋگىندە ءبىر عانا كانديدات ۇسىنۋعا قۇقىلى. ەكىنشى، داۋىس بەرۋگە قۇقىعى بار ءتيىستى وكرۋگ سايلاۋشىلارىنىڭ جالپى سانىنىڭ كەمىندە 1 پايىزىنىڭ قولىن جيناۋدى قامتاماسىز ەتە وتىرىپ، ءوزىن-وزى ۇسىنۋ ارقىلى جۇزەگە اسىرادى. ءۇشىنشى، ەگەر ۇسىنۋ اياقتالاتىن كۇنگە ەكەۋدەن كەم كانديدات ۇسىنىلسا، اۋدان اكىمى ۇسىنادى. بۇل رەتتە ۇسىنىلعان كانديداتتار بولماعان نە ۇسىنۋ مەرزىمى اياقتالاتىن كۇنى 1 كانديدات ۇسىنىلعان جاعدايدا اۋدان اكىمى جەرگىلىكتى قوعامداستىق جينالىسىنىڭ كەلىسىمى بويىنشا تيىسىنشە ەكى نە ءبىر كانديداتتى ۇسىنۋعا قۇقىلى»، – دەدى ورتالىق سايلاۋ كوميسسياسىنىڭ مۇشەسى.